د احمد شرع او د کردانو په مشرۍ د سوریې د دیموکراتیکو ځواکونو ترمنځ د اوربند هوکړه وشوه

د راپورونو له مخې، په پلازمېنه دمشق کې د سوریې د لنډمهالي ولسمشر احمد شرع او د کردانو په مشرۍ د سوریې د دیموکراتیکو ځواکونو د قومندان مظلوم عبدي ترمنځ چې د سوریې شمال ختیځ کنټرولوي، د یوې ناستې په ترڅ کې يو تړون لاسلیک شو.

د دې تړون د شرایطو له مخې، د کردانو په مشرۍ د سوریې دیموکراتیک ځواکونو هوکړه کړې چې له حکومتي ادارو سره به یوځای کېږي.

د دې اته ماده ییز تړون یوه ماده کې راغلي چې ټول سوريايي وګړي به د مذهبي او قومي شاليد پرته په ټولو دولتي ادارو کې او سياسي بهير کې د استازيتوب حق ولري.

همدا ډول په ټولو سیمو کې په بشپړ اوربند هم هوکړه شوې ده.

ټاکل شوې چې یوه اجرائیوي کمیټه به د کال تر پایه پورې د دې تړون احکام پلي کړي.

د سوریې د انتقالي پړاو مشر احمد الشرع د یکشنبې پر ورځ د "ملي یووالي او ټولنیز ثبات د ساتلو" غوښتنه وکړه.

الشرع دا خبرې د یکشنبې په سهار د دمشق په یوه جومات کې د وینا پر مهال وکړې.

نوموړي د سوریې په ساحلي سیمو کې د پنجشنبې له ورځې پیل شوو نښتو ته په اشاره وویل: "هغه څه چې په هېواد کې روان دي، هغه ننګونې دي چې اټکل یې کېده." هغه زیاته کړه: "موږ باید تر خپله وسه ملي یووالی او ټولنیز ثبات وساتو."

د سوریې د دفاع وزارت ویاند ډګرمن حسن عبدالغني ویلي، امنیتي ځواکونو هغه سیمې بېرته تر خپل کنټرول لاندې راوستې چېرې چې "د امنیتي سرتېرو پر ضد بریدونه شوي وو."

نوموړي زیاته کړه چې ځواکونه لا هم د "جنایتکارانو پاتې مرکزونو" پر ضد عملیات کوي او له ښکېلو کسانو سره قانوني چلن ته دوام ورکوي.

عبدالغني د شنبې ماښام په یوه ویډیویي وینا کې له هغو کسانو وغوښتل چې د امنیتي ځواکونو ملاتړ ته راوتلي وو، بېرته خپلو سیمو ته ستانه شي.

هغه امنیتي سرتېري هم په کلکه راوبلل چې د خپلو مشرانو له امرونو سره جدي چلن وکړي، له کورونو لرې پاتې شي او له یرغل څخه ډډه وکړي.

هغه ټینګار وکړ چې امنیتي ځواکونه به ژر هغه کسان له سیمې وباسي چې له عملیاتو سره تړاو نه لري.

د سوریې دولتي خبري اژانس راپور ورکړی چې د شنبې پر ورځ د سوریې د عامه امنیت ادارې پر یوه ګزمه د اللاذقیې ختیځ ته د الحفې ښار ته نژدې کمین نیول شوی و، چې له امله یې یو امنیتي سرتېری ووژل شو او دوه نور ټپیان شول.

له دې مخکې، د شنبې په ورځ، دولتي ځواکونو د سوریې د ساحلي سیمو ډېری برخې چې له پنجشنبې راهیسې د نښتو شاهدې وې، بېرته تر خپل کنټرول لاندې راوستلې.

د سوریې دولتي خبري اژانس (سانا) د دفاع وزارت د یوه چارواکي له قوله ویلي، چې د هېواد شمال لوېدیځ ته د ساحلي سیمې ته غځېدلي سړکونه تړل شوي چې "د سرغړونو مخه ونیول شي، بې نظمي پای ته ورسول شي او ثبات ورو ورو بېرته راشي."

یاد اژانس د عامه امنیت ادارې د یوه چارواکي له قوله ویلي، چې په ساحلي سیمو کې د "پخواني رژیم د پاتې شونو د کړنو له امله د ناامنۍ او بې‌ثباتۍ" له کبله، د غلاوو پېښې ډېرې شوې دي.

د سوریې دولتي رسنۍ داسې انځورونه خپاره کړي، چې ادعا کېږي په لاذقیه، طرطوس، جبله او بانیاس ښارونو کې د امنیتي ځواکونو پراخ حضور ښيي.

د سوریې دفاع وزارت ویلي، چې ځواکونو یې د هغو کسانو برید شنډ کړی، چې وزارت یې د "پخواني رژیم پاتې شوني" بللي دي.

دغه برید د اللاذقیې په ښار کې د سمندري ځواکونو د قوماندانۍ پر مقر ترسره شوی و، خو ځواکونه وتوانېدل چې "سیمې ته بېرته ثبات راولي."

د سوریې امنیتي ځواکونه د سلګونو ملکیانو په وژلو تورن شوي

د جګړې د څار يوه ډله ادعا کوي چې، د سوریې امنیتي ځواکونو د دې هېواد په ساحلي سیمو کې د روان تاوتریخوالي پر مهال د علوي اقلیت سلګونه ملکيان وژلي دي.

په بریتانیا کې مېشت د سوریې د بشري حقونو د څار سازمان وايي، شاوخوا ۷۴۵ ملکي وګړي د جمعې او شنبې په ورځ د علوي اقليت پر ضد د "ډله‌ ییزو وژنو" پر مهال وژل شوي دي.

بی‌بي‌سي دا ادعاوې په خپلواکه توګه نه شي تائيدولی.

راپورونه وايي، سلګونه کسان له خپلو کورونو تښتېدلي دي. دا سیمه د پرځول شوي ولسمشر بشار الاسد چې خپله هم علوي دی، اصلي مرکز ګڼل کېږي.

د سوريې د بشري حقونو د څار سازمان د راپور له مخې، په تېرو دوو ورځو کې له ۱۰۰۰ زیات کسان وژل شوي چې دا د تېر ډسمبر راهیسې، کله چې یاغیانو د اسد رژیم نسکور کړ، تر ټولو مرګونې پېښې دي.

ويل کېږي په وژل شویو کې د سوریې د حکومت لسګونه سرتېري او د اسد وفادار جنګیالي شامل دي، چې د پنجشنبې راهیسې په لاذقیه او طرطوس سيمو کې په جګړو کې ښکېل وو.

د سوريې د بشري حقونو د څار سازمان له مخې په دې نښتو کې د اسلامپالو تر مشرۍ لاندې د حکومت ۱۲۵ ځواکونو او بشار اسد ته وفادار ۱۴۸ وسله وال وژل شوي دي.

د سوریې د دفاع وزارت یوه ویاند د سنا دولتي خبري اژانس ته ویلي، د دوی د امنيتي ځواکونو پر ضد د "خیانت‌کارانه بریدونو" وروسته، حکومت بېرته کنټرول ترلاسه کړی دی.

د جمعې په ورځ، د ښار یوه فعال بي‌بي‌سي ته وویل، د علوي ټولنه اوس د "وېرې" په حالت کې ده، او سلګونه کسان د جګړې له سیمو د تېښې هڅې کوي.

د رویټرز خبري اژانس راپور ورکړی چې ګڼ شمېر خلکو په لاذقیه کې د روسیې یوې پوځې اډې ته پناه وړې ده.

د ځايي رسنيو په وينا، لسګونه کورنۍ ګاونډي هېواد لبنان ته کډه شوې دي.

د سوریې لپاره د ملګرو ملتونو ځانګړي استازي، ګیر پېډرسن، ويلي چې دی د ملکیانو د وژنو د "دردناکو راپورونو" له کبله سخت اندېښمن دی.

هغه له ټولو خواوو غوښتي چې له هغو کړنو ډډه وکړي چې د هېواد ثبات ته زیان رسوي او "ټول‌شموله سیاسي لېږد"له ګواښ سره مخ کوي.

علویان، چې د شیعه اسلام یوه څانګه ده، د سوریې د ټول نفوس شاوخوا ۱۰٪ برخه جوړوي، په داسې حال کې چې د دغه هېواد ډېری نفوس سني مسلمانان دي.