Wararkii ugu dambeeyay dagaal beeleed dad badan ku dhinteen oo ka dhacay gobolka Galagduud iyo sida hadda xaaladdu tahay

Tebin toos ah

1. 31 Maajo 2024Dhageyso: Donald Trump oo lagu helay dhamaan dacwadihii lagusoo oogay iyo dhawaan oo la xukumayo

   Donald Trump ayaa noqday madaxweynihii ugu horreeyay ee Mareykan ah oo lagu helo dambi, kaddib markii xeerbeegtida dacwaddiisa la horgeeyay ee New York ay ku heleen dhammaan 34 dacwadood ee lagu soo oogay.

   Eedeymaha oo dhan waxay la xiriiraan been abuurka diiwaankiisa ganacsi si uu u qariyo lacagihii la siiyay haweeneyda lagu magacaabo Stormy Daniels oo ah haweeney jisha filmaanta aan wanaagsaneyn, lacagtaasi ayaa sida la sheegay uu Trump ku aamusiinayay ka hor doorashada madaxweynaha 2016-ki.

2. 31 Maajo 2024Mareykanka iyo Ingiriiska oo duqeeyay fariisimo ay leeyihiinta Xuutiyiinta Yemen

   

   Xigashada Sawirka, Getty Images

   Ciidamada qalabka sida ee Mareykanka iyo Ingiriiska ayaa duqeymo dhanka cirka ah ku qaaday bartilmaameedyo ku yaalla dalka Yemen, iyagoo uga aargoosanaya weerarrada ay kooxda Xuutiyiinta ku qaaday maraakiib marayay badda cas.

   Taliska dhexe ee Mareykanka ayaa sheegay in ciidamada isku dhafka ah ay duqeeyeen saddex iyo toban bartilmaameed oo ku yaalla deegaannada ay Xuutiyiinta maamulaan, ayna soo rideen 8 diyaaradood oo nooca aan duuliyaha lahayn ah.

   Telefishinka Xuutiyiinta Al Masirah ayaa sheegay in ugu yaraan laba qof ay ku dhinteen ( toban kalena ay ku dhaawacmeen) weerar ay ku qaadeen dhismo raadiye oo ku yaalla magaalada Xudeydah.

   Bilihii la soo dhaafay Xuutiyiinta ayaa weerar ku qaaday maraakiibta caalamiga ah ee mara badda cas, taasoo ay ku sheegeen inay tahay mid ay ku garab taagan yihiin Falastiiniyiinta ku sugan Gaza.

3. 30 Maajo 2024Nadaafadda afka: Maxaa sababa af urka, sidee ayaadna uga hortagi kartaa?

   

   Xigashada Sawirka, Getty Images

   Nadaafadda afka waa dhibaato ay khubarrada ku sheegeen inay saameyso ku dhowaad 25 boqolkiiba bulshada caalamka. Waxaa jiro waxyaabo badan oo dhibaatadan sabab u ah, balse intooda badan waxay la xiriiraan nadaafadda afka.

   Af urka ayaa isku buuq ku abuura bulshada, waxaana takoor la kulmi kara qofkii lagu arko, balse ma fududa in laga soo kabto dhibaatadan.

   Wargeyska arrimaha caafimaadka ee MNT ayaa daabacay warbixin dadka ka caawin karta wax ka qabashada xaaladdan.

   Wargeyska Medical News Today ayaa ku qiyaasaya in afartii qofba uu qof ka mid ah qabo dhibaatada af urka. Halkan kasii akhri

4. 30 Maajo 2024Gobollo dhowr ah oo ka tirsan Mareykanka oo koronto la'aan noqday

   

   Xigashada Sawirka, Google

   Duufaano iyo dabeylo wata iyo onkod ayaa sababay koronto la’aan ilaa fiidnimadii isniinta ku dhawaad ​​300,000 oo qof oo ku nool todobo gobol oo Mareykanka ah.

   Bilowgii todobaadkan, duufaano ba’an ayaa dilay ugu yaraan 23 qof, guryo ayaa burburay boqolaalna way ku dhaawacmeen.

   Khubarada saadaasha hawada ayaa sheegay in khatarta ugu weyn ee cimiladu ay u weecatay dhanka bari, iyada oo daboolaysa dhul balaaran oo dalka ah min Alabama ilaa New York.

   Onkod badan, daadad, dabaysha wax yeello wadata iyo roob culus ayaa la filayaa.

   Adeegga Cimilada Qaranka ee Mareykanka ayaa saadaaliyay roob xooggan oo ka da'aya Xeebta Bari, oo ay ku jiraan qaybo ka mid ah New York, Pennsylvania, New Jersey iyo Maryland.

   Wakaaladdu waxay intaa ku dartay in roobabkan culus ay wehlin doonaan khataro yar yar iyo onkod xooggan oo ka dhacaya qaybo ka mid ah waqooyi bari ilaa koonfur bari ee Maraykanka.

   Adeegga cimiladu wuxuu sidoo kale saadaaliyay onkod aad u daran oo dhinaca Texas ah Talaadadii, halkaasoo xawaaraha dabayshu ay gaari karto 120 km / h ama ka badan.

5. 30 Maajo 2024Soomaaliya iyo dalal kale oo isku af gartay in aan laga aamusin arrinta Qasa

   Shirka wasiirrada warfaafinta jaamacadda carabta oo ay Soomaaliya qayb ka tahay oo ka dhacay caasimadda Manaama ee dalka Baxrayn ayaa looga hadlay sidii warbaahinta Carabtu cod ugu noqon lahayd qadiyadda Qasa.

   Shirka ayaa ku soo beegmaya xilli ay xaalad cakirin iyo duqaymo ka socdaan deegaanka Rafax ee koonfurta magaalada Qaza halkaasi oo ay dad badan ku dhinteen kuwa kalana ay ku barakaceen.

   Wasiirka warfaafinta Soomaaliya Daauud Aways oo ka qayb galay shirka ayaa u warramay BBC-da

6. 29 Maajo 2024Israel oo sheegtay in dagaalka uu soconayo sanadka oo dhan

   

   Xigashada Sawirka, EPA

   La taliyaha ammaanka qaranka ra’iisul wasaaraha Israel, Benjamin Netanyahu, ayaa sheegay in uu filayo in dagaalka Gaza uu sii socon doono inta ka hartay sanadka.

   Tzachi Hanegbi ayaa sidoo kale sheegay in militeriga Israel ay hadda gacanta ku hayaan 75 % dhulka u dhexeeyay Gaza iyo Masar ee loo yaqaan marinka Philadelphia.

   Militeriga Israel oo weli wada howlgalkeeda Rafax ayaa sheegay in 3 ka mid ah askartooda la dilay iyadoo 3 kalena ay si xun ugu dhaawacmeen.

   Hadalka Hanegbi waxaa uu u muqdaa in Israel aysan diyaar u aheyn in ay u hogaansanto baaqyada caalamiga ee ah in ay xabadjoojin kala xaajoogto Xamaas iyagoo ku beddelenaya in la sii daayo la haystayaasha

7. 29 Maajo 2024Hooyo 15 sano kaddib heshay wiilashada oo u tahriibay Libya

   Faadumo Maxamuud Axmed, waa hooyo waayeel ah oo ku nool Muqdisho, waxa ay heshay warkii ugu faraxada badnaa mudooyin sanado ah kaas oo ahaa in laba wiil oo ay dhashay ay ka mid noqdeen dad laga soo badbaadiyey magafayaal ku haystay muddo dheer dalka Liibiya. Labada wiil ayaa jiray 15 sano 2009-kii ka hor inta aysan tahriibin. Warka wiilasha waxaa hooyo Faadumo u sheegay dad ka aqoonsaday baraha bulshada. Maxamed Baashe Khaliif ayey uga warrantay siday noqotay markii ay heshay warka wiilasheeda.

8. 29 Maajo 2024Soomaaliya ayaa ka digtay dabeyllo iyo mowjado ka soo socda badweynta Hindiya

   

   Xigashada Sawirka, Getty Images

   Wasaaradda Dekadaha iyo Gadiidka Badda Soomaaliya ayaa ka digtay in ay jiraan mowjado xoog leh iyo dabeylo kuwaas oo waxyeello u geysan kara gaadiidka badweynta Hindiya.

   Wasaaradda waxay sheegtay in xiliga bad-xiranka uu bilowday una sii soconaya ilaa iyo bisha sagaalaad ee sanadkan.

   Wasiir ku xigeenka Wasaaradda Dekadaha Mudane Saadaam Maxamuud Cabdi ayaa shirjaraa'id uu qabtay kaga hadlay arintaan. Wuxuuna uga digay dekadaha badweynta Hindiya in ay jiraan mowjado xoog leh iyo dabeylo kuwaas oo waxyeelo u geysan kara kalluumeysatada iyo noockasta oo gaadiid badda ah.

   “Waxaan uga digayaa ganacsatada Somaaliyeed in aysan hantidooda soo saaran gaadiidka aan iska caabin karin mowjadaha badda iyo dabeylaha”

   Sidoo kale shirka jaraa’id ayaa lagu sheegay in waalidiinta deggan xeebaha ay la socdaan ubadkooda aadaya badda.

9. 29 Maajo 2024Soomaaliya ayaa ka mid noqotay dalalka ugu sareeya ee laga fuliyo xukumada dilka

   

   Xigashada Sawirka, AFP

   Tirada dadka xukunka dilka lagu fuliyo ee adduunka ayaa gaartay sanadkii la soo dhaafay ee 2023-kii halkii ugu sareysay. Dalalka Bariga Dhexe ayaa ka mid ah meelaha xukumada dilka ay ka kordheen sida ay sheegtay hay’adda caalamiga ee Amnesty.

   Shanta dal ee ugu sareeya ayaa kala ahaa Shiinaha, Iran, Sacuudiga, Soomaaliya iyo Mareykanka. Warbixinta Amnesty ayaa muujineysa in Soomaaliya ay ka horeysa Mareykanka oo ay ku jirta kaalinta afaraad.

   Iran oo kaalinta labaada ku jirta waxay fulisay boqolkiiba 74 xukumada dilka. Xukumadaas waxaa ka mid ah kuwa la xiriira maandooriyaha halka Sucuudigana uu yahay 15%.

   Tirada guud ee xukumada dilka ee la ogyahay ayaa gaareysa 1,153, waxayna ka dhaceen 16 dal. Sodon boqolkiiba ayey ka badan tahay sanadkii ka sii horeeyay ee 2022-kii.

10. 29 Maajo 2024Koonfur Afrika oo maanta loo dhaqaaqay codeyn muhiim ah

    

    Xigashada Sawirka, Getty Images

    Dadka Koonfur Afrika ayaa maanta codeynaya mid ka mid ah doorashooyinka guud ee ugu muhiimsan dalka ilaa dhammaadkii midabtakoorka.

    Xisbiga talada haya ee ANC kaas oo wadanka ka xoreeyay cadaanka tirada yar xukunkooda ayey suuragal tahay in uu lumiyo aqlabiyadda baarlamaanka markii ugu horeysay.

    Taageerayaasha xisbiga ayaa aad uga careysan musuqmaasuqa, dambiyada sii kordhaya iyo biyo iyo koronto yarida. Madaxweyne Cyril Ramaphosa oo codkiisa ka dhiibanayay Soweto ayaa sheegay in aysan shaki ugu jirin in dadka ay tusinayaan kalsoonidooda ANC.

    John Steenhuisen, hoggaamiyaha xisbiga mucaaradka ee Isbahaysiga Dimuqraadiyadda ayaa ku tilmaamay codeynta in ay tahay fursadii ugu horeysay ee muddo soddon sano ah isbeddel lagu sameynayo.

    Dad badan oo codeynayay ayaa qabowga arroortii hore ku dhiiraday in ay soo baxaan. Qaar ka mid ah dadweynahaas ayaa carro kaga tagay goobaha codeynta ee dalka kaddib markii la waayay magacooda.

    “Magaceyga wuu aqrin waayay mashiinka. Markasta halkan ayaan ka codeeyaa balse maanta magaceyga halkan ma yaalo”’ ayuu yiri Nomvula Ziswana oo 53 jir ah

11. 29 Maajo 2024Saddax askari oo Israel ah ayaa lagu dilay magaalada Rafax

    

    Xigashada Sawirka, Getty Images

    Ciidamada Israel ayaa sheegtay in saddax askari oo ka tirsanaa guutada Nahal lagu dilay dagaal ka dhacay daanta gabeed ee Gaza. Askarta Israel kaga dhimatay ilaa markii uu dagaalka bilowday ayaa ah 639 iyo 290 oo ku dhimatay markii uu bilowday howlgalka dhulka.

    Warbaahinta Israel ayaa sheegtay in saddaxda askari ay ku dhinteen qarax ka dhacay dhismo ku yaal Rafax. Afhayeen u hadlay ciidamada Israel ayaa sheegay in sidoo kale sarkaal iyo labo askari ay si xun ugu dhaawacmeen qaraxa.

    Goobjoogo ayaa sheegay in tobaneeyo ay ku dhinteen kuna dhawacmeen weerarka diyaaradaha ku qaadeen xerada barakacayaasha ee Al-Mawasi ee galbeedka magaalada.

    Wasaaradda caafimaadka Gaza ayaa sheegtay in dhammaan isbitaalada waaweyn iyo xarumaha caafimaadka Rafax aysan shaqeyneynin.

    Dhinaca kale, Afhayeen u hadlay aqalka cad, John Kirby, ayaa sheegay in Mareykanka uusan aaminsaneyn in Isreal ay qaaday duullaan buuxa.

12. 29 Maajo 2024Dal buufinno ay ku jiraan qashin iyo waxyaabo kale oo wasakhaysan u diray dal kale

    

    Xigashada Sawirka, Reuters

    Kuuriyada Waqooyi ayaa Kuuriyada Koonfurta ku daadisay ugu yaraan 260 buufin ah oo siday qashin, taasoo keentay in maamulku uga digo dadka deegaanka inay guryaha kasoo baxaan.

    Milatariga Kuuriyada Koonfureed ayaa sidoo kale shacabka uga digay inay taabtaan buufinnada cad cad iyo bacaha ku xiran sababtoo ah waxaa ku jira "qashin wasakh ah iyo waxyaabo xun".

    Buufinnada ayaa laga helay siddeed ka mid ah sagaal gobol oo ku yaalla Kuuriyada Koonfureed, waxaana hadda la baarayaa dhab ahaantooda.

    Kuuriyada Woqooyi iyo Kuuriyada Koonfureed waxay labaduba adeegsadeen buufino ololahooda dacaayadda tan iyo dagaalkii Kuuriya ee 1950-meeyadii.

    Millatariga Kuuriyada Koonfureed ayaa goor sii horeysay sheegay in ay baarayaan in ay jiraan waraaqo borobogaando ah oo Kuuriyada Waqooyi ay kusoo dartay buufinnada.

    Dhacdadan dhawaan dhacday ayaa timid maalmo kadib markii Kuuriyada Waqooyi ay sheegtay in ay ka aargoosan doonto "warqadaha iyo qashinka kale ee inta badan lagu daadiyo" meelaha xuduudka ah ee ay wadaan dhaqdhaqaaqayaasha koonfurta.

13. 29 Maajo 2024Dhageyso: Wiil hooyadiis ku dilay Baangad qoortana ka jaray iyo sida hadda xaalkiisu yahay

    Magalada Wajeer ayaa waxaa ka dhacday dhacdo ay dad badan aad uga argagaxeen kadib markii wiil dhalinyaro ah uu dilay hooyadii.

    Dhacdadan naxdinta leh oo ka dhacday mid ka mid ah xaafddaha magaalada Wajeer ayaa la sheegay in dilka hooyada uu wiilkani u adeegsaday baangad.

    Gudoomiyaha xaafadda Cali Macow ee uu falkani ka dhacay Maxamed Xasan ayaa BBC-da u sheegay in ninka falka gaystay uu imika ku jiro gacanta booliiska.

14. 29 Maajo 2024Shan arrin oo Nebiga (NNKH) ka dardaarmay balse meelaha qaar dunida caadi ka noqday

    

    Xigashada Sawirka, Getty Images

    Khudbaddii u bambaysay ee Nabi Muxamed (NNKH) jeediyay xajkiisii u dambeeyay uguna horreeyay ee Dulxija sanadkii tobnaad ee Hijriyada ayaa waxay ahayd markii uu Nebiga NNKH bini’aadamka oo dhan uu ujeediyay khudbad ay mudan tahay in qof walba oo Muslim ah uu akhriyo.

    Nabi Muxamed (NNKH) afar jeer ayuu soo cumraystay, balse hal mar oo kaliya ayuu soo gutay waajibaadka xajka.

    Waxaan diiradda saareynaa shan waxyaabood oo uu Nabiga ka dardaarmay balse dunida maanta aynu joogno caadi ka noqotay.

    ”Dadyohow i dhagaysta, ma garanayo in sanadkaan kadib aan mar dambe halkaan soo istaagi doono. Halkan kasii akhri

15. 29 Maajo 2024Nicki Minaj oo raalli gelin bixisay kadib markii la xiray

    

    Xigashada Sawirka, Getty Images

    Nicki Minaj ayaa raali galin siisay taageerayaasheeda kadib markii ay dib u dhigtay bandhig faneed lagu qaban lahaa magaalada Manchester kadib markii lagu xiray dalka Holland.

    Fanaanada, oo 41 jir ah, ayaa lagu waday bandhigga ku qabato garoonka Co-op ee magaalada Sabtidii, laakiin waxay noqotay inay joojiso daqiiqaddii ugu dambeysay kadib markii lagu qabtay tuhun ah inay dhoofinayso daroogo.

    Waxaa lagu ganaaxay (£300; $380) waxaana loo oggolaaday inay safarkeeda sii wadato.

    Iyadoo ku dhowaaqday inay hadda ku qaban doonto garoonka Manchester Isniinta soo socota, ayay soo dhigtay baraha bulshada qoraal kooban: "Waan ka cudur daaranayaa dhammaan dhibka ay arrintani keentay, run ahaantii waxaan rajeynayaa inaad kasoo qayb gashaan bandhigga 3-da Juun, runtii wuxuu noqon doonaa mid cajiib ah."

16. 29 Maajo 2024Dadka reer Koonfur Afrika oo u dareeray codeyn iyo xisbigii talada hayay 30 sano oo loo baqayo

    

    Xigashada Sawirka, Getty Images

    Dadka reer Koonfur Afrika ayaa maanta ah u dareeraya goobaha codbixinta, taas oo noqon karta doorashadii ugu saamaynta badnayd tan iyo markii uu dhamaaday midab-takoorka.

    Carada ka dhalatay adeegyada dadwaynaha ee sii xumaanaya, fadeexadaha musuqmaasuqa iyo dembiyada sii kordhaya ayaa muujinaya in xisbiga talada haya ee ANCuu ku lumin karo aqlabiyaddiisa markii ugu horreysay soddon sano.

    Weriyaha BBC-da ee Johannesburg ayaa sheegaya in haddii xisbigii Koonfur Afrika ka xoreeyay xukunkii caddaanka tirada yaraa uu lumiyo taageero badan, in lagu qasbi doono in uu isbahaysi la sameysto xisbiyada mucaaradka. Taasi, oo keeni karta xasilooni darro.