تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د اسرائيلو دفاع وزير: ايران ښايي د غزې او لبنان په شان برخليک سره مخامخ شي
د اسرائیلو د دفاع وزیر یواف ګالانت ایران ته خبرداری ورکړی چې که دغه هېواد وغواړي اسرائیل ته زیان ورسوي، د غزې او بیروت په شان له برخلیک سره به مخامخ شي. له بلې خوا، د سپاه پاسداران د سمندري ځواکونو قوماندان وویل، "موږ له دوښمن سره د جګړې سناریو طرحه کړې ده."
ښاغلي ګالانټ نن پر اسرائیلو وروستي توغندیز برید ته په اشاره وویل، ایران د اسرائیلو د هوايي ځواک دوه اډې په نښه کړې، خو "ایران زموږ د هوايي ځواک تجهیزاتو ته زیان نه دی رسولی، هېڅ الوتکې ته زیان نه دی رسېدلی او هېڅ هوایي کنډک له کاره نه دی لوېدلی. "
"هرڅوک چې فکر کوي موږ ته زیان رسوي موږ به یې مخه ونیسو، باید په غزه او بیروت کې زموږ لاسته راوړنو ته وګوري."
پر لبنان د اسرائیلو له برید راهیسې بیروت کې "تر ټولو درنه بمباري" شوې
په بیروت کې بمبارۍ دوام لري. تېره شپه د لبنان پلازمېنه له سختو او بېرحمانه بریدونو سره مخ شوه او لږ تر لږه ۳۰ هوايي بریدونو د دغه ښار جنوب ولړزاوه.
په انځورونو کې خلک ترهېدلي ښکاري او لوی اورونه او لوګي لیدل کېږي. د بي بي سي خبريال وايي ښايي د ګازو يو پمپ يا د وسلو ډيپو په نښه شوي وي. لبناني چارواکو ویلي بریدونو کې لږ تر لږه ۲۳ تنه وژل شوي.
د لبنان د روغتیا وزارت د وژل شویو او ټپي شویو خلکو شمېرې خپرې کې دي چې وايي د اسرائیلو د تېرې شپې په بمباریو کې وژل شوي او ټپیان شوي دي.
په همدې حال کې د اسرائیلو پوځ د اکټوبر پر اومه د حماس د برید د کلیزې په مناسبت خپلو ځواکونو د تیارسئ امر کړی.
بیروت کې خبریالان وايي، تېره شپه دا ښار ډېر نارامه و چې ډېری اسرائیلي بریدونه د جنوبي حومه په ضاحیه سیمه کې شوي.
تر ګهیځه د لویو او کوچنیو چاودنو غږونه اورېدل کېدل او د سهار رڼا په راتلو له بمبار شویو سیمو لوګي ولیدل شول.
د اسرائیلو پوځ وړاندې د بیروت له سوېل نه د خلکو د وتلو خبرداری ورکړی و؛ په ورته وخت کې د اسرائيلو پر شمالي سیمو د حزبالله توغوندي دوام لري.
د بیروت نړیوال هوايي ډګر ته څېرمه هم ګهیځ د اسرائیلو پوځ بمبارۍ کړې دي، خو د مرګژوبلې په اړه یې کره معلومات نه دي خپاره شوي.
د مکرون څرګندونو ته د نتنياهو توند غبرګون؛ بيروت کې تازه چاودنې شوې
د اسرائیلو لومړي وزیر بنيامين نتنياهو د فرانسې دولسمشر اېمانوېل مکرون هغو څرګندونو ته سخت غبرګون ښودلی چې اسرائیلو ته یې د وسلو د ورکړې ځنډول او په لبنان کې د سملاسي اوربند غوښتنه کړې وه.
د دغو دواړو مشرانو ترمنځ ناندرۍ وروسته له هغه پيل شوې چې ښاغلي مکرون پر لبنان د اسرائیلو ځمکني عملیات د "تاسف وړ" وبلل.
مکرون چې پاریس کې یې یوې غونډې ته وینا کوله د سملاسي اوربند او اسرائیلو ته د وسلو ورکړه کې د ځنډ غوښتنه وکړه. ده وویل دا یو "تناقض" دی چې له یوې خوا د اوربند غوښتنه کېږي او له بلې خوا اسرائیلو ته وسلې ورکول کېږي.
د اسرائیلو لومړي وزیر په یوه ویډیويي پيغام کې د ښاغلي مکرون دا څرګندونې وغندلې او ټينګار یې وکړ هر هغه هېواد چې د اسرائیلو ملاتړ نه کوي د ایران او د هغه د نیابتي ډلو ملاتړي دي.
نوموړي وويل، "په داسې حال کې چې اسرائیل د ایران په مشرۍ د بربریت پر وړاندې جګړه کوي ټول متمدن هېوادونه باید د اسرائیلو غوڅ ملاتړ وکړي، خو ولسمشر مکرون او د ځینو لوېدیځو هېوادونو مشران اسرائیلو ته د وسلو د ورکړې د ځنډ غوښتنه کوي. دوی لپاره د شرم خبره ده.
آیا ایران حزب الله، حوثیانو، حماس او نورو نیابتي ډلو ته یې د وسلو ورکړه ځنډوي؟ طبعا نه یې ځنډوي."
د فرانسې ولسمشر د نتنیاهو له دې ویډیو پيغام وروسته د هغه غبرګون له مبالغې ډک وباله او داسې یو غبرګون یې یاد کړ چې د ده په وینا د فرانسې او اسرائیلو له ملګرتیا سره اړخ نه لګوي.
بيروت کې تازه چاودنې
د دواړو مشرانو تر منځ دغه ناندرۍ په داسې حال کې شوې چې بېګاه یو ځل بیا اسرائیلو د لبنان پلازمېنې بیروت ځینو اوسېدونکو ته له خبرداري وروسته پر څو سیمو هوايي بریدونه وکړل.
بیروت کې د بي بي سي خبریاله نفیسه کهنورد وايي لږ تر لږه د شپږو زورو چاودونه غږونه یې اورېدلې دي. نوموړې وايي د بیروت له سویلي سیمو لوګي پورته کېږي او په هوا کې ډرون الوتنه کوي.
ځایي رسنیو رپوټ ورکړی چې یو برید هوايي ډګر ته څېرمه شوی او درې نور د بیروت په څنډو کې شوي دي.
حزب الله ډلې هم ویلي د اسرائیلو پر شمالي سیمو یې تازه توغندیز بریدونه کړي دي. دې ډلې ويلي حیفا ښار ته نژدې یوه هوايي اډه یې په نښه کړې ده.
د اسرائیلو لومړي وزیر ویلي پر لبنان بریدونو کې د حزب الله ډلې د وسلو یوه لویه برخه له منځه تللې او په دې سره له یادې ډلې سره د جګړې لوری بدل شوی.
د اسرائیلو د پوځ ویاند بیا ویلي د عملیاتو له پيل د حزب الله ۴۴۰ وسله وال وژل شوي دي. د هغه په وینا د یادې ډلې ۳۰ مشران هم د وژل شويو کسانو په ډله کې شامل دي.
له دې سره هم مهال د اسرائیلو لومړي وزیر یو ځل بیا ویلي چې د ایران توغندیز برید ته غبرګون او له ځانه دفاع د اسرائیلو حق دی او د غچ اخيستنې دا برید به خامخا کوي.
فرانسپرس خبري اژانس د یوه اسرائیلي لوړ پوړې چارواکي له قوله رپوټ ورکړی چې اسرائیل پر ایران د برید لپاره چمتو والی نیسي.
له بلې خوا د کډوالو په چارو کې د ملګرو ملتونو لوی کمشنر فیلیپو ګرانډې چې لبنان ته تللی خبرداری ورکړی چې دغه هېواد د کډوالۍ له یوه خطرناک کړکېچ سره مخامخ دی. پر لبنان د اسرائیلو له ځمکنیو عملیاتو وروسته څه د پاسه يو ميليون کسان له خپلو مېنو بې ځایه شوي او یو لوی شمېر ګاونډي جګړه ځپلي هېواد سوریې ته کډه شوې دي.