Gusubira muri DR Congo kwa Joseph Kabila byaba bisobanuye iki?

Joseph Kabila Kabange wahoze ari perezida wa DR Congo agiye gusubira muri icyo gihugu "bidatinze", "ahereye mu burasirazuba" bwacyo, nk'uko ibinyamakuru RFI na Jeune Afrique bivuga ko yabyemeje mu nyandiko.

Kabila yaherukaga kugaruka mu itangazamakuru mu kwezi kwa kabiri uyu mwaka ubwo yavugaga ko igihugu cye "kiri hafi guturika kubera intambara y'imbere", hari nyuma y'imyaka itanu 'acecetse'.

Biriya binyamakuru byombi birasubiramo inyandiko ye ivuga ko agiye gutaha "mu minsi iri imbere" kuko igihugu cyifashe nabi mu rwego rw'umutekano "no mu zindi nzego zose z'ubuzima bw'igihugu", kugira ngo afashe gushaka ibisubizo.

Kabila yaba agiye kugaruka mu gihugu cye mu gihe hari umuhate wa leta ya Qatar wo guhuza umutwe wa M23 na leta ya Kinshasa mu biganiro biteganyijwe muri iki cyumweru mu mujyi wa Doha.

Félix Tshisekedi wamusimbuye mu 2019 – mu guhererekanya ubutegetsi kwa mbere kwabayeho mu mahoro mu mateka ya DR Congo nyuma y'amatora yanenzwe kubamo uburiganya – mu kwezi kwa kabiri yavuze ko Kabila ari we muntu "nyawe uri inyuma y'ibi byose", amushinja gufasha umutwe wa M23.

Mu kumusubiza, Kabila – ubusanzwe ni umusenateri wa DR Congo – mu kwezi gushize yabwiye abanyamakuru muri Afurika y'Epfo ati: "Iyo mba mfatanyije na M23, ibintu byari kuba bitandukanye cyane n'uko bimeze uyu munsi".

Mu buryo buzwi, Kabila aheruka muri DR Congo mu Ukuboza 2023 ubwo yahavaga mbere y'amatora. Umuvugizi we Barbara Nzimbi yatangaje kenshi ko Kabila yavuye mu gihugu ku mpamvu z'amasomo muri kaminuza ya Johannesbourg muri Afurika y'Epfo.

Ibikorwa bye hanze ya DR Congo byakomeje gutera inkeke ubutegetsi bwa Tshisekedi kugeza ashinje Joseph Kabila ko ari we uri inyuma y'inyeshyamba za M23 na Corneille Nangaa wigeze kuba umuntu wa hafi cyane ya Kabila.

Gusubira muri DR Congo bivuze iki? – Isesengura rya BBC

Inkuru ivuga ko agiye kugaruka mu gihugu ni imwe mu zirimo kuvugwaho cyane n'Abanyecongo ku mbuga nkoranyambaga mu gihe ibyo azakora agarutse bitazwi neza kugeza ubu.

Joseph Kabila ni umwe mu bantu bafite ijambo rikomeye muri politike ya DR Congo akagirayo n'abamushyigikiye benshi. Imbaraga ze ari imbere mu gihugu zishobora gutera impungenge ubutegetsi buriho.

Mu gihe yavuze ko nataha azahera mu burasirazuba, nk'uko bivugwa na RFI na Jeune Afrique, ntibizwi neza niba ari mu ntara ya Katanga aho asanzwe afite abamushyigikiye benshi, cyangwa ari mu ntara za Kivu mu mijyi nka Bukavu cyangwa Goma igenzurwa na AFC/M23 ya Corneille Nangaa.

Olivier Kamitatu wahoze ari minisitiri muri leta ya Kinshasa akaba ubu ari umuvugizi wa Moïse Katumbi, bombi bari ku ruhande rutavuga rumwe n'ubutegetsi bwa Tshisekedi, yaciye amarenga ko mu kugaruka muri Congo Kabila ashobora kujya mu gice kigenzurwa na M23.

Mu butumwa yanditse ku rubuga X, Kamitatu yagize ati: "Guhitamo kwa Joseph Kabila kujya iburasirazuba, ahagenzurwa n'inyeshyamba, si ikimenyetso gusa: ni ukwibutsa ahazaza hacu dusangiye twese."

Mu gihe Kabila yasubira muri DR Congo akagaragaza gushyigikira umutwe wa AFC/M23 bishobora gushyira igitutu ku nzira y'ibiganiro by'amahoro irimo kugeragezwa na Qatar ndetse n'Ubumwe bwa Afurika.

Kabila, uvuga ko yaba aje gufasha gushaka ibisubizo ku bibazo bya DR Congo, ntibizwi neza niba yakwifatanya na M23 cyangwa yakwinjira mu bikorwa byo gushaka amahoro mu gihugu cye muri rusange.

Mu gihe yakwifatanya na M23 bishobora gufasha uyu mutwe – Kinshasa ivuga ko ari umutwe w'iterabwoba – kugira ijambo no kumvikanisha impamvu urwana uvuga ko ahanini ari iyo kurengera abo mu bwoko bw'Abatutsi bambuwe uburenganzira bwabo mu gihugu. Kandi kongera gukorana kwe na Corneille Nangaa bari mu gihugu bishobora gutera impungenge Kinshasa.

Byaba binemeje ibyo Kinshasa imaze igihe ishinja Kabila byo kuba ari inyuma ya AFC/M23.

Abasesenguzi batandukanye bavuga ko nyuma yo kugera ku butegetsi Tshisekedi yanze gukurikiza 'amasezerano y'ibanga' – yabaye mbere y'amatora – hagati ye na Kabila, y'uburyo bagomba gusaranganya ubutegetsi ubwo yabumuhaga mu 2019.

Ibyo byaje kwemezwa na Corneille Nangaa – ubu ukuriye AFC/M23 – wahoze ari perezida wa komisiyo y'amatora ya DR Congo, wagiranye ibibazo n'ubutegetsi bwa Tshisekedi nyuma yo kuvuga bimwe mu byari muri ayo masezerano. Ibi, uruhande rwa Tshisekedi rwarabihakanye ruvuga ko ari ibinyoma.

Ku rundi ruhande, mu gihe Joseph Kabila yasubira muri DR Congo akinjira mu bikorwa byo gushaka amahoro nta ruhande abogamiyeho, umuhate we ushobora gutanga umusaruro kubera imbaraga za politike bizwi ko afite mu gihugu. Ashobora kuba ingenzi mu buhuza hagati ya M23 na Kinshasa, hagati ya Nangaa na Tshisekesi, abagabo bombi azi neza.

Ibyo bishobora kuganisha ku bwumvikane bushya bwa politike hagati ya AFC/M23 na Kinshasa, ndetse na Kabila ubwe usanzwe unenga ubutegetsi bwa Tshisekedi kandi na we ushobora kuba agifite intego n'ibyifuzo bye muri politike, nyuma y'imyaka 18 yamaze ku butegetsi.