Dan majalisar da ya fasa wayarsa don adawa da ƙudurin hana yaɗa labaran ƙarya

Ku latsa hoton da ke sama don kallon bidiyon:

Wani ɗan majalisar dokokin Turkiyya ya ragargaza wayarsa da guduma a yayin da yake jawabi a gaban majalisar.

Burak Erbay, wanda tsohon ɗan majalisa ne a jam'iyyar adawa ta Republican People's Party, ya yi hakan ne don nuna adawa da wani ƙudurin doka da gwamnati ke goyon baya na yaƙi da yaɗa labaran ƙarya a intanet.

A ƙarƙashin dokar, dole shafukan sada zumunta su ringa bayyana bayanan masu yaɗa labaran ƙarya.

Dokar za ta iya sa a ɗaure mutum tsawon shekara uku idan aka kama shi da laifi.

Masu suka sun ce, idan har ƙudurin ya zama doka, to zai tauye ƴancin faɗin albarkacin baki.