/** * https://gist.github.com/samthor/64b114e4a4f539915a95b91ffd340acc */ (function() { var check = document.createElement('script'); if (!('noModule' in check) && 'onbeforeload' in check) { var = false; document.addEventListener('beforeload', function(e) { if (e.target === check) { = true; } else if (!e.target.hasAttribute('nomodule') || !) { return; } e.preventDefault(); }, true); check.type = 'module'; check.src = '.'; document.head.appendChild(check); check.remove(); } }());

Gwaith atgyweirio rheilffordd i barhau am wythnos

Gweithwyr yng Nghaerdydd

Bydd rhai gwasanaethau trên yn parhau i gael eu heffeithio am wythnos arall oherwydd gwaith atgyweirio yng Nghaerdydd.

Cafodd nifer o deithiau eu gohirio o ganlyniad i waith ar bont y tu allan i orsaf Caerdydd Canolog rhwng dydd Sul a dydd Mawrth.

Dywedodd Trafnidiaeth Cymru a Network Rail fod rhan fwyaf o'r gwasanaethau i mewn ac allan o Gaerdydd wedi dychwelyd i'r drefn arferol erbyn nos Fawrth.

Ond mae gwaith yn parhau ar y bont yr wythnos hon, ac mae bysiau neu ddargyfeiriadau mewn grym tan 28 Ebrill ar gyfer gwasanaethau o Gaerdydd i Lyn Ebwy.

Mae'r bont yn cysylltu gorsaf Caerdydd Canolog a gorsaf Heol y Frenhines, ac yn rhedeg ar draws y gwasanaethau sy'n cysylltu Caerdydd Canolog, Casnewydd a thu hwnt.

Fe wnaeth arolwg dros y penwythnos ganfod fod rhai problemau strwythurol, ac fe gafodd gwasanaethau eu gohirio yn sgil pryderon am ddiogelwch.

tren yng nghaerdyddGetty Images

Bydd trenau ond yn rhedeg rhwng Glyn Ebwy a Chasnewydd am weddill yr wythnos, gyda gwasanaethau bws neu deithiau wedi eu harallgyfeirio rhwng Casnewydd a Chaerdydd, meddai datganiad.

Mae gwasanaethau bws hefyd wedi eu trefnu ar gyfer y daith rhwng Caerffili a Coryton, meddai Trafnidiaeth Cymru a Network Rail.

Bydd gwasanaethau trên ychwanegol yn cael eu hychwanegu wrth i'r gwaith gael ei gwblhau yr wythnos hon, meddai'r cwmniau.

'Pob hawl i deimlo'n rhwystredig'

Daw hyn yn dilyn tridiau o waith atgyweirio ar bont sydd wedi arwain at amharu ar wasanaethau, meddai Great Western, Trafnidiaeth Cymru a Cross Country.

Dywedodd aelod Plaid Cymru o'r Senedd, Delyth Jewell, fod y problemau sy'n digwydd ar hyn o bryd gyda seilwaith rheilffyrdd yn symptom "o hanes Cymru o fod yn brin o ran ariannu rheilffyrdd".

Dywed llefarydd trafnidiaeth y Ceidwadwyr, Peter Fox, fod gan deithwyr "bob hawl i deimlo'n rhwystredig, yn enwedig ar ôl cynnydd o 6% ym mhris tocynnau eleni".

Dywedodd ysgrifennydd trafnidiaeth Cymru, Ken Skates, fod Trafnidiaeth Cymru yn "gweithio'n agos â Network Rail ac Amey Infatructure Cymru i ddatrys y broblem frys mor fuan a diogel ac sy'n bosib".

Pynciau cysylltiedig