Umugore wagurishije umukobwa we w'imyaka 6 yakatiwe gufungwa burundu muri Afurika y'Epfo

Umugore wo muri Afurika y'Epfo wahamwe no gushimuta no kugurisha umwana we w'umukobwa w'imyaka itandatu yakatiwe gufungwa burundu, hamwe n'abafatanyacyaha be babiri.

Racquel "Kelly" Smith, umukunzi we Jacquen Appollis n'inshuti yabo Steveno van Rhyn, bakatiwe ibyo bihano nyuma y'umwaka urenga Joshlin Smith abuze mu buryo bw'amayobera, ubwo yari ari hanze yo mu rugo mu gace ka Saldanha Bay, hafi y'umujyi wa Cape Town.

Nubwo ishakishwa ry'uwo mukobwa, wabuze muri Gashyantare (2) mu 2024, ryamenyekanye cyane, ntabwo araboneka.

Abashinjacyaha bo muri Afurika y'Epfo bavuga ko yagurishijwe ngo akoreshwe ubucakara ariko mu rubanza ibyo ntibyemejwe mu buryo ntakuka.

Byemezwa ko Smith nyina w'uyu mwana, wari waragizwe imbata n'ibiyobyabwenge, yari acyeneye amafaranga.

Uko gukatirwa kubaye nyuma y'urubanza rwamaze ibyumweru umunani rwari rwashigukiwe cyane muri Afurika y'Epfo, aho abatangabuhamya n'abashinjacyaha bavuze ku birego byinshi biteye ubwoba.

Ubwo yabasomeraga ibihano ku wa kane, umucamanza Nathan Erasmus yavuze ko "nta tandukaniro" yasanze hagati y'abo batatu.

Yagize ati: "Ku kirego cyo gucuruza umuntu, ukatiwe gufungwa burundu. Ku kirego cyo gushimuta, ukatiwe gufungwa imyaka 10", nuko amashyi ngo 'kaci kaci!' mu rukiko.

Umucamanza Erasmus byamufashe isaha irenga kugira ngo asome umwanzuro w'urukiko ndetse yari yigengesereye ubwo yatangaga incamake y'uru rubanza, akanavuga ku bintu by'ingenzi byaruranze.

Yacyashye abo uko ari batatu, cyane cyane Van Rhyn na Smith, avuga ko nta kwicuza ibikorwa byabo bagaragaje.

Yagize ati: "Nta kintu na kimwe nshobora kubona cyatuma mbakatira igihano gito."

Yanavuze ku ngaruka imyitwarire yabo yateje ku batuye i Middelpos, aho uwo mwana w'umukobwa yabaga, avuga ko iyo myitwarire "yashenguye" abahatuye.

Smith, w'imyaka 35, n'abafatanyacyaha be, nta mbamutima bagaragaje ubwo basomerwaga ibyo bihano mu kigo cya rubanda cy'i Saldanha, aho urwo rubanza rwabereye kugira ngo abaturage bashobore kurwitabira.

Polisi yavuze ko igikorwa cyo gushakisha uwo mwana w'umukobwa kizakomeza, ndetse no hanze y'Afurika y'Epfo.

Ubushinjacyaha bw'Afurika y'Epfo bwakiriye neza ibyo bihano bakatiwe ndetse bushima umurimo wakozwe n'itsinda ryabwo wo kugaragaza ko Joshlin "yagurishijwe [ndetse] agezwa ku muguzi yari agenewe", hagamijwe "kumukoresha nabi, ni ukuvuga ubucakara cyangwa ibikorwa bisa n'ubucakara".

Muri urwo rubanza, umwirondoro w'"umuguzi" ntiwigeze na rimwe uhishurwa.

BBC yasabye ubushinjacyaha bw'Afurika y'Epfo kugira amakuru arenzeho butanga ariko umuvugizi wabwo nta yo yatanze.

Abantu bari basabwe n'imbamutima mbere y'isomwa ry'umwanzuro w'urubanza, abaturage bari barakaye bavuga ko abo uko ari batatu bakwiye "igihano gikaze kuko baragikwiye".

Mbere y'isomwa ry'urubanza, Amanda Smith-Daniels, nyirakuru wa Joshlin, yongeye kwinginga umukobwa we kugira ngo "ungarurire umwana [umwuzukuru] wanjye cyangwa umbwire aho ari".

Yabwiye igitangazamakuru Newzroom Afrika cyo muri Afurika y'Epfo ati: "Sinumva ko igihano icyo ari cyo cyose bazahabwa kizatuma umwuzukuru wanjye agaruka."

Amanda Smith-Daniels yavuze ko ibura rya Joshlin ryashenguye umuryango we.

Muri urwo rubanza, urukiko rwumvise ubuhamya buteye ubwoba bw'abatangabuhamya barenga 30, batanze ishusho y'ubuzima bubi uwo mwana yabayemo, nyuma akaza kubura.

Kelly Smith n'abafatanyacyaha be banze gutanga ubuhamya cyangwa guhamagaza abatangabuhamya bo kubashinjura.

Ubuhamya bukomeye cyane ni ubwatanzwe na Laurentia Lombaard, inshuti n'umuturanyi wa Smith, waje kuba umushinja.

Lombaard yavuze ko Smith yamubwiye ko yakoze "ikintu cy'ubupfapfa" akagurisha Joshlin ku muvuzi gakondo. Muri Afurika y'Epfo, umuvuzi gakondo azwi nka "sangoma" mu rurimi rw'Iki-Zulu.

Lombaard yabwiye urukiko ko "umuntu [bivugwa ko] watwaye Joshlin yashakaga amaso ye n'uruhu rwe".

Pasiteri wo muri ako gace yatanze ubuhamya ko mu mwaka wa 2023, yumvise Smith - umubyeyi w'abana batatu - avuga ku kugurisha abana be ku ma-rand (akoreshwa muri Afurika y'Epfo) 20,000 (angana na miliyoni 1,5 FRW) kuri buri umwe muri bo, nubwo yavuze ko yanakwemera macye kuri ayo, amadolari 275 y'Amerika (arenga 380,000 FRW) kuri buri mwana we.

Nuko umwarimu wa Joshlin na we abwira urukiko ko mu ishakisha, Smith yari yaramubwiye ko umukobwa we yamaze kugera "mu bwato, muri kontineri, ndetse bari mu nzira berekeza muri Afurika y'uburengerazuba".

Ubuhamya bwa Lombaard n'ubwa pasiteri ni bwo bwashingiweho cyane mu kumuhamya icyaha.