DRC: Igisirikare cyasabye ko Kabila yamburwa ubudahangarwa kikamujyana mu nkiko
Ahavuye isanamu, Joseph Kabila/PR
Minisitiri w'ubutabera wa Repubulika ya Demokarasi ya Congo yatangaje ko ubushinjacyaha bwa gisirikare bwasabye Sena y'iki gihugu gukuraho Joseph Kabila ubudahangarwa kugira ngo bumukurikirane ku byaha yavuze birimo ubwicanyi n'ubugambanyi.
Uruhande rwa Joseph Kabila wahoze ari perezida wa DR Congo ntacyo ruratangaza.
Kabila, usanzwe ari umusenateri ubuzima bwose – nk'uko biteganywa ku wabaye perezida wa DR Congo – mu kwezi gushize ubucamanza bwatangaje ifatirwa ry'imitungo ye, ubwo byavugwaga ko yagarutse muri Congo akajya i Goma ahagenzurwa na M23. Nta gihamya cyemeje neza ko yagiyeyo, cyangwa aho ari ubu.
Mu itangazo ryo ku wa gatatu nijoro, Minisitiri w'ubutabera Constant Mutamba, yavuze ko Ubushinjacyaha bwa gisirikare bwasabye Sena kwambura Joseph Kabila ubudahangarwa nka senateri kugira ngo bushobore kumukurikirana.
Yavuze ko ubwo bushinjacyaha bufite "ibimenyetso simusiga" ku "ubugambanyi, ubwicanyi, kuba mu mutwe wigometse, ibyaha by'intambara, ibyaha byibasiye inyoko muntu", ibyaha avuga ko bibera mu ntara za Kivu ya Ruguru na Kivu y'Epfo.
Joseph Kabila ntacyo aravuga kuri ibi byaha bikomeye Mutamba yavuze ko ashinjwa.
Muri Gashyantare (2) uyu mwaka, Tshisekedi yavuze ko Kabila ari we muntu "nyawe uri inyuma y'ibi byose", amushinja gufasha umutwe wa M23.
Mu kumusubiza, muri Werurwe (3) Kabila yabwiye abanyamakuru muri Afurika y'Epfo ati: "Iyo mba mfatanyije na M23, ibintu byari kuba bitandukanye cyane [n'uko bimeze uyu munsi]."
Abashyigikiye Joseph Kabila muri DR Congo bashinja leta ko imaze igihe ikora ibikorwa birimo gufatira imitungo ye mu gihugu no kwibasira bamwe mu bo mu ishyaka rye.
Kabila, w'imyaka 53, yategetse iki gihugu imyaka 18 kuva mu 2001 ubwo yari afite imyaka 29, nyuma yuko se Laurent-Désiré Kabila yari amaze kwicwa arashwe.
Mu buryo buzwi, Kabila aheruka muri DRC mu Kuboza (12) mu 2023 ubwo yahavaga mbere y'amatora. Umuvugizi we Barbara Nzimbi yatangaje kenshi ko Kabila yavuye mu gihugu ku mpamvu z'amasomo muri Kaminuza ya Johannesburg muri Afurika y'Epfo.
Ibikorwa bye hanze ya DR Congo byakomeje gutera inkeke ubutegetsi bwa Perezida Félix Tshisekedi kugeza ashinje Joseph Kabila ko ari we uri inyuma y'inyeshyamba za M23 na Corneille Nangaa, wigeze kuba umuntu wa hafi cyane ya Kabila.
