Tshisekedi yadohoreye Abanyamerika bari bakatiwe igihano cy'urupfu ku ruhare muri 'Coup d'État' yaburijwemo

Perezida Félix Tshisekedi wa Repubulika ya Demokarasi ya Congo yadohoye igihano cy'urupfu akigira icya burundu ku Banyamerika batatu bari bahamwe no kuba mu itsinda ry'abagerageje guhirika ubutegetsi mu mwaka ushize.

Itegeko-teka ryasomwe mu makuru ya nijoro kuri televiziyo y'igihugu ku wa kabiri, rivuga ko abo ari Marcel Malanga Malu, Tyler Thompson na Zalman-Polun Benjamin Reuben.

Bari bakatiwe icyo gihano muri Nzeri (9) mu mwaka wa 2024. Iryo tegeko-teka rivuga ko cyemejwe n'ubucamanza bwa gisirikare ku itariki ya 27 Mutarama (1) uyu mwaka, gihinduka "ntakuka" ku itariki ya 9 Werurwe (3).

Mu kubadohorera, Tshisekedi yagendeye ku kuba ubushinjacyaha bwarabasabiye imbabazi ndetse no ku cyifuzo cya minisitiri w'ubutabera.

Ntibisobanutse niba iki gifungo cya burundu bazagikomereza muri gereza i Kinshasa. Amerika na DRC nta masezerano bifitanye yo kohererezanya abashakishwa n'ubucamanza.

Muri Nzeri mu 2024, abantu 37 – barimo abo Banyamerika batatu, Umwongereza, Umubiligi n'Umunya-Canada – bakatiwe igihano cy'urupfu nyuma yuko urukiko rubahamije kugerageza guhirika perezida wa Repubulika ya Demokarasi ya Congo.

Muri Gashyantare (2) uyu mwaka, uwo Munye-Congo ufite n'ubwenegihugu bw'Ububiligi, Jean-Jacques Wondo, yarekuwe n'ubucamanza bwa DRC ku mpamvu z'ubugiraneza ajya kwivuza mu Bubiligi ari na ho yagumye kugeza ubu.

Wondo, umushakashatsi akaba n'impuguke mu bijyanye n'umutekano, yari yafashwe nyuma y'iryo gerageza rya 'Coup d'État' ashinjwa kuba "umucurabwenge" wayo.

Bose hamwe, abantu 51 ni bo baburanishijwe n'urukiko rwa gisirikare, iburanishwa ryabo ryagiye ritangazwa kuri radio na televiziyo by'igihugu.

Abo bagabo bashinjwe kugaba igitero cyo ku itariki ya 19 Gicurasi (5) mu 2024 ku ngoro ya perezida no ku rugo rwa Vital Kamerhe, umukuru w'inteko ishingamategeko ya DRC ubu, icyo gihe wari uri hafi kugera kuri uwo mwanya.

Christian Malanga, Umunyamerika ukomoka muri DR Congo, ucyekwaho kuba ari we wari uyoboye uwo mugambi, yiciwe muri icyo gitero, hamwe n'abandi batanu mu bo bari bari kumwe muri icyo gitero.

Umuhungu we Marcel, umwe mu Banyamerika batatu badohorewe igihano, mbere yabwiye urukiko ko se yari yamukangishije kumwica iyo yanga kwitabira icyo gitero.

Tyler Thompson we yari asanzwe ari inshuti ya Marcel. Uko ari babiri, bafite mu myaka 20 y'amavuko. Bakinanaga umupira w'amaguru muri leta ya Utah muri Amerika.

Mu mwaka ushize, mukase Miranda Thompson yabwiye BBC ko "nta gitekerezo na busa" yari afite ku kuntu Tyler Thompson yisanze muri DR Congo.

Yagize ati: "Twarumiwe neza neza ku bijyanye n'ibyari birimo kuba, n'ibyo tutazi.

"Ikintu cyose twamenyaga ni icyo twabonaga kuri Google."

Umunyamerika wa gatatu, Benjamin Zalman-Polun, yakoranaga ubucuruzi na Christian Malanga.

Igihano cy'urupfu kimaze imyaka igera kuri 20 kidashyirwa mu ngiro muri DR Congo – abakatiwe igihano cy'urupfu ahubwo bagafungwa burundu.

Muri Werurwe (3) mu 2024, leta yakuyeho iryo hagarikwa ryo gutanga icyo gihano, ivuga ko bicyenewe ko "abagambanyi" bakurwa mu gisirikare, kidakora neza, cy'icyo gihugu. Ariko kuva icyo gihe nta gihano cy'urupfu cyari cyashyirwa mu bikorwa.