M23 ivuga ko itava i Walikale mu gihe hakiri 'drone' za FARDC

Umutwe w'inyeshyamba wa M23 urwanya ubutegetsi bwa Repubilika ya Demokarasi ya Congo uvuga ko wabaye uretse kwimura abarwanyi bawo ubakura mu mujyi wa Walikale kuko ingabo za leta n'abo bafatanya batakuye indege nto z'intambara zitajyamo umupilote (drones) aho i Walikale.

Mu butumwa ku rubuga nkoranyambaga X, umuvugizi wa M23 Lawrence Kanyuka yagize ati: "Bitandukanye n'ibyari byumvikanishijwe mu itangazo ryo ku cyumweru..., FARDC n'ingabo zifatanya na yo ntibakuye 'drones' zabo njya rugamba muri Walikale. Ibyo bitinza iyimurwa ry'ingabo za AFC/M23 muri ako karere."

Nta cyo ubutegetsi bwa Kinshasa bwari bwatangaza kuri ibi bushinjwa na M23.

Kanyuka yavuze ko kugumishayo izo 'drone' ari "inzitizi ikomeye ku iyubahirizwa ry'agahenge ndetse bishyira mu byago gahunda ziriho ubu zigamije amahoro".

Ku cyumweru FARDC yari yatangaje ko yamenye ibyatangajwe ku wa gatandatu na M23 byo kwimura abarwanyi bayo ibakura i Walikale mu ntara ya Kivu ya Ruguru, "mu gushyira mu bikorwa itangazo" rihuriweho ry'inama y'i Doha hagati Perezida wa DRC Félix Tshisekedi, Perezida w'u Rwanda Paul Kagame na Emir wa Qatar Sheikh Tamim bin Hamad bin Khalifa Al Thani.

M23 yari yatangaje ko yafashe icyemezo cyo kwimura abarwanyi bayo kugira ngo "habeho umuti wo mu mahoro w'intambara".

Ariko yongeyeho iti: "Turashimangira ko ubushotoranyi ubwo ari bwo bwose cyangwa ibitero bishya by'ingabo zishyize hamwe n'ubutegetsi bwa Kinshasa ku baturage b'abasivile, harimo no mu turere twabohowe no ku birindiro byacu, bizatuma habaho kwisubiraho ako kanya kuri iki cyemezo."

ONU, DRC, n'ibihugu bimwe byo mu burengerazuba bw'isi bashinja u Rwanda gufasha inyeshyamba za M23. Mu bihe bya vuba aha u Rwanda ntirwabihakanye byeruye cyangwa ngo rubyemere.

Mu itangazo ryo ku cyumweru, umuvugizi wa FARDC Jenerali Majoro Sylvain Ekenge yavuze ko ingabo za leta zari "zigiye gukurikirana, ziri maso, ivanwa ry'ingabo z'umwanzi i Walikale kugeza mu burasirazuba bwa Kibati".

Jenerali Ekenge yavugaga ko FARDC n'abo bafatanya bazirinda "kugaba ibitero ku mwanzi muri icyo gihe", FARDC na yo ikitega ko umwanzi azirinda kugaba ibitero kugira ngo bitume ibikorwa bigamije amahoro bikomeza.

M23 yatangaje ibi ku munsi w'ejo mu gihe abakuru b'ibihugu bo mu muryango w'Afurika y'uburasirazuba (EAC) n'abo mu muryango w'iterambere w'Afurika y'amajyepfo (SADC), bahuriye mu nama mu buryo bw'ikoranabuhanga ry'iyakure biga ku kugarura amahoro n'umutekano mu burasirazuba bwa DRC no mu karere.

Bashyizeho itsinda ry'abahuza batanu: Uhuru Kenyatta wahoze ari Perezida wa Kenya, Olusegun Obasanjo wahoze ari Perezida wa Nigeria, Kgalema Motlanthe wahoze ari Perezida w'Afurika y'Epfo, Catherine Samba Panza wahoze ari Perezida w'inzibacyuho wa Centrafrique na Sahle-Work Zewde wahoze ari Perezida wa Ethiopia.

Abategetsi bitabiriye iyo nama banzuye ko mu minsi irindwi iri imbere bazongera guhurira mu nama irimo n'abo bahuza.

Ejo ku wa mbere kandi, ibiro bya perezida w'Angola byatangaje ko icyo gihugu gisoje uruhare rwacyo rw'ubuhuza mu biganiro bya Luanda hagati y'u Rwanda na DRC.

Angola yavuze ko ari ukugira ngo Perezida João Lourenço yibande ku nshingano nshya yatangiye mu kwezi gushize nk'umukuru w'umuryango w'Ubumwe bw'Afurika.