Umuriro uriko uraka hagati ya Trump na Musk - biraherera he?

None bigenda gute iyo umuntu atunze kuruta abandi bose n'umunyapolitike arusha abandi bose ububasha bafatanye amashati, bariko baraturana hasi?

Ni vyo isi iriko irarorera – kandi si ikintu gito. Donald Trump na Elon Musk bari mu ba mbere bafise amajwi ashika kure cane, ubu bakaba bacanyemwo, mu gihe ukutumvikana kwandurutsemwo intambara y'amajambo.

Trump aragabisha ku masezerano y'ubucuruzi bukomeye Musk afitaniye na reta ya Amerika, ari na yo umugambi w'ikompanyi yiwe SpaceX ujanye n'ikirere uhagazeko.

Trump yanditse ku rubuga hwaniro rwiwe ati: "Uburyo bworoshe bwo kuzigama amahera mu nteguro y'amahera tuzokoresha, amamiriyaridi n'amamiriyaridi y'amadorari, ni uguhagarika imfashanyo n'amasezerano ya reta na Elon".

Ari nka hamwe reta ya Trump yohinduka Musk, uno mutunzi ruhebwa yegeranije amatungo atagira uko angana biciye mu buhinga bwa none yohura n'amakuba.

Ejo ku wa kane, agaciro k'amatungo y'ikompanyi yiwe Tesla karakorotseko ibice 14% .

Ariko na we ntaheranwa. Inyuma y'aya majambo, Musk yasavye ko Trump abogozwa mbere anamugabisha ku vyo avuga ko yohagarika amafaranga ahabwa amakompanyi yiwe.

Musk kandi yavuze ko ariko arihutisha ihagarikwa ry'ibikorwa vy'umugambi wiwe werekeye ikirere uzwi nka Dragon, ari nawo Amerika igenderako mu kurungika ibikoresho n'abahinga bayo mu vyo ikirere ku kigo mpuzamakungu c'ikirere.

Ariko haciye amasaha makeya, asa n'uwisubiyeko, aho mu kwishura ku butumwa bumwe bwari bwacishijwe kuri X bumusaba kugabanya akariro, yanditse ati: "Impanuro nziza. Ok, ntituzohagarika Dragon".

Musk afise uburyo bwinshi bwo kwishura Trump, harimwo uguha amafaranga abakeba b'umugambwe w'Abarepubulikani mu matora yo mu mwaka uza hamwe no mu matora y'ibanze muri uwo mugambwe.

Hanyuma kandi, mu masaha yitereye y'ejo ku wa kane, yarekuye "ibombe rutura nyayo" – avuga, ariko ata vyemezo atanga, ko Trump aboneka mu madosiye atarashirwa ahabona kuri Jeffrey Epstein yagirizwa ivyaha bishingiye ku gitsina.

Umunyamabanga wiwe ajejwe kumenyesha amakuru, Karoline Leavitt, yishuye adakeye mu maso yiyamiriza ibirego vya Musk.

Ati: "Iki ni igihe kitari ciza Elon ariko aracamwo, kubera adashimishwa n'integuro nziza nini y'amafaranga azokoreshwa na reta [ico yita One Big Beautiful Bill] kuko itarimwo ivyo yipfuza".

Musk ashobora kudatsinda intambara hagati ya we na reta yose ya Trump, ariko ashobora kwonona izina rya Trump muri poritike n'umugambwe w'Abarepubulikani.

Trump - kumbure ashobora kuba abizi - asa n'uwahavuye agabanya akariro.

Yaririnze kugira ico avuga kuri Musk igihe yashikiriza ijambo muri Maison Blanche/White House (ibiro vy'umukuru w'ico gihugu), aca acisha ubutumwa ku rubuga hwaniro rwa Truth Social buvuga ko ata ngorane afise "gucanamwo na we", ariko ko yipfuza ko yari kuba yamaze kuva muri reta mu mezi aheze.

Gutukana n'uguterana ubwoba

Uku kutumvikana kwatanguye bukebuke mu ndwi iheze, birakomera ku wa gatatu, ku muhingamo w'ejo ku wa kane bikaba ari ho vyabaye nabi cane muri Maison Blanche.

Umukuru wa reta y'Ubudagi mushasha, Friedrich Merz, yari umushitsi kuri uwo musi yari yicaye mu gacerere kadasanzwe yajumarariwe, mu gihe Perezida Trump yariko avuga nk'uwahemukiwe n'umukunzi wiwe.

Yaratangajwe n'ukungene Musk anegura intwaro yiwe. Yamiriye kure ivy'uko yari gutsindwa mu matora y'umukuru w'igihugu y'umwaka uheze iyo itaba imfashanyo y'amamiriyoni amajana n'amajana ya Musk.

Yavuze kandi ko Musk yahinduye imvugo kubera gusa ikompanyi yiwe y'amamodoka Tesla, izokorwako n'ingingo y'uno mu repubulikani yo gukuraho akarusho ku makori yo ku mamodokari akoresha umuyagankuba.

Musk yaciye yihutira gusohora ubutumwa ku rubuga hwaniro rwiwe, X, aho asanzwe akurikiranwa n'abantu imiriyoni 220, ati: "Ni agire ivyo ashaka vyose".

Avuga ko ivy'uturusho ahabwa ku modoka ataco bimubwiye, kandi ko yashaka kugabanya ideni ry'igihugu avuga ko rigeramiye ubuzima bw'igihugu. Ashimangira ko Abademokarate bari kuba batsinze iyo itaba imfashanyo yiwe. "Ndabira intashima nk'iyi," ni ko yabwiye Trump.

Umuhingamo wose waheze ari mu bitero bidasanzwe, ibintu birakomera muri iyi mishamirano.

Musk na Trump bari bagize urunani rukomeye ariko rutari rwitezwe, rwagiye gutuma uno mutunzi ruhebwa ahabwa amabanga yo kugabanya amahera reta ikoresha mu ntwaro ya Trump. Ikizwi nka DOGE (impfunyapfunyo ya Department of Government Efficiency) ca Musk, ni kimwe mu bintu vyavuzwe cane mu misi 100 ya mbere ya Trump, kuko cugaje amashirahamwe ya reta gishira mw'ibarabara ibihumbi n'ibihumbi vy'abakozi ba reta.

Ariko ntivyafashe igihe kirekire imbere y'uko abantu batangura kubona ko impera n'imperuka aba bantu babiri rutura bari bagiye gucanamwo.

Mu gihe kanaka, vyasa n'uko ibi ata shingiro vyari bifise. Trump yagumye ashigikiye cane Musk n'igihe icizere c'uno mutunzi cari cagabanutse, kubera ugucanamwo n'abari mu ntwaro.

Igihe ikiringo c'imisi 130 ya Musk nk' "umukozi wa reta adasanzwe" carangira mu ndwi iheze, aba bagabo basezeranye nk'abavandimwe, aho Musk yahawe urupfunguruzo rw'inzahabu rwa Maison Blanche mbere Trump asa n'uwerekana ko Musk ashobora no kuzogaruka muri Maison Blanche umusi kanaka.

Nta gukekeranya ko ubutumire bwose bwahagaritswe kandi ko n'amaserire (serrures) yahinduwe.

"Elon na jewe twari dufitaniye ubucuti bunini," ni ko Trump yavuze ejo ku wa kane – amajambo yerekana ikintu gikomeye kubera ikoreshwa ryayo mu mwanya kahise.

Hari abibaza ko ingingo nshasha zibuza abinjira mu gihugu Trump yatangaje ku wa gatatu mw'ijoro, ibihano bishasha yafatiye kaminuza ya Harvard, hamwe n'ibivugwa vy'uko yoba arondera ko ubutegetsi bwiwe bukora amatohoza kuri Joe Biden yahoze arongoye igihugu vyari amayeri yo kurondera ingene abantu bokwiyibagiza amajambo ya Musk yo kumunegura.

Maison Blanche n'incuti zayo mu nama nshingamateka na nkenguzamateka basa n'abitonda kugira ngo ntibabandanye babacanishamwo gusumba inyuma y'amajambo yiwe.

'Umuntu arakirira aho uwundi ahombeye'

Ikibazo kihari ubu ni ukumenya iyo ntambara izotera ija. Abashingamateka n'abakenguzamateka b'Abarepubulikani bishobora kutaborohera kugumya abanywanyi babo kugira babandanye bashigikiye amategeko ya Trump, mu gihe Musk aguma abandanya atera intege mu majambo abamuva inyuma, kumbure mbere anabemerera amahera.

Trump aramaze kugabisha ko ashobora guhagarika amasezerano reta ifitaniye na Musk, ariko ashobora kandi no gutanguza urugamba rwo gutuza bamwe mu ncuti ziwe zigisigaye mu mugambi DOGE, canke naho agasubira gutanguza itohoza ryari ryatanguye ku butegetsi bwa Biden ku bijanye n'ubucuruzi bwa Musk.

Ubu ibintu vyose birashoboka.

Hagati aho, Abademokarate babirabira kure, bibaza ingene bovyifatamwo. Hariho bake bipfuza gusubiza mu ruhongore Musk yahoze atanga uburyo muri uno mugambwe. Ariko kandi hariho umugani wa kera uvuga ngo umwansi w'umwansi ni umugenzi.

"Umuntu arakirira aho uwundi ahombeye", ni ko Liam Kerr, ajejwe imigambi mu mugambwe w'Abademokarate, yabwiye ikinyamakuru Politico. "Ikintu ico ari co cose akora kizanira akarusho Abademokarate kibabaza Abarepubulikani".

Ubu Abademokarate basa n'abanezerewe no kuja ku ruhande bakareka aba bagabo bakabandanya bashihana, kandi mu gihe cose bazoba bagishamirana, izi mvururu zishobora kuroha ibintu vyose muri politike ya Amerika.

Ariko ikiriho ni uko ata muntu yokwitega ko iyi mishamirano ari iyigiye guhagarara ubu bwa vuba.

"Trump afise imyaka 3.5 asigaje nk'umukuru w'igihugu", ni ko Musk yanditse kuri X, "ariko jewe ndacafise imyaka 40 n'iyirenga".