Imvo n'Imvano ku mutekano w'abarokotse jenoside yo mu Rwanda mu 1994

Mu kiganiro Imvo n'Imvano c'uyu munsi turavuga ku mutekano w'abarokotse jenoside yo mu Rwanda mu 1994. Ni mu gihe ibihumbi by'abakoze jenoside bamwe barangije ibihano byabo abandi bakaba bitegura kurangiza ibyo bihano no kurekurwa bagasubira kubana n'abandi baturage barimo abo biciye.

Hari bamwe mu bakoze Jenoside bateye intambwe yo gusaba imbabazi abo biciye nyuma yo kwemera icyaha-ibyo byakozwe benshi bakiri muri gereza.

Gusa haracyari impungenge n'icyoba ku barokotse jenoside kuko hari abahamwe n'ibyaha bya jenoside banze gusaba imbabazi.

Raporo y'ihuriro ry'abadepite mu nteko ishingamategeko y'u Rwanda mu kwezi kwa gatatu uyu mwaka yagaragaje ko hirya no hino mu gihugu habaye ibikorwa by'ubwicanyi bwibasira abarokotse jenoside ndetse n'ingengabitekerezo ya jenoside mu Rwanda no mu karere u Rwanda ruherereyemo ishobora gushyira mu kaga ubuzima bw'abarokotse jenoside-

Hagati aho leta yatangiye inyigisho zihariye zihabwa abafungiye jenoside mbere y'uko barangiza ibihano bakatiwe bagasubira mu miryango yabo. Iki kiganiro mwagiteguriwe kandi murakigezwaho na Yves Bucyana.