د خوب ځای بېلول: ولې په ځینو واده کړیو جوړو کې دود شوی؟

دا چاره د کورونا وبا پر مهال لاپسې ډېره دود شوه. په دې رپوټ کې بي بي سي ځینو کسانو سره غږېدلې چې ولې یې خپل د خوب بسترونه جلا کړي دي.

آنام چې دلته یې نوم مستعار یاد شوی وايي، په خوب کې یې مېړه دومره خرېده چې نور ورته د زغم نه و، او خوب یې ترې نه شو کولی.

کله به یې چې مېړه په خوب کې خریدل پیل کړل، دې به په لټ اړاوه او یا به یی ښوراوه چې غلی شي او یوه شېبه په ارامه ویده شي. خو دا هر څه بې ګټې و.

وروسته له ۳۵ کلونو ورته نور دا حالت له زغمه ووت، پرېکړه یې وکړه چې نور به خپل مېړه سره په یوه خونه کې نه ویده کېږي.

انام بي‌ بي‌ سي سره خبرو کې ویلي: "په خپل کار مې تمرکز نه شو کولی، ټوله ورځ به ستړی وم."

تاسې ښايي د بل ګډ وډ خوب یوه یا دوه شپې وزغمئ خو ټول عمر یې نه شي زغملی.

هغې ویلي: "دا اسانه پرېکړه نه وه، یو څه یې زمونږ زړونه رامات کړل. خو کله چې پوه شوو چې په یوه کوټه کې یو ځای نه ویده کېدو سره ارامه یوو، نو بیا خوشاله شوم."

انام او ۴۳ کلن مېړه یې د هغې تګلارې ملاتړي دي چې "د خوب د بستر د جلاوالي" په نامه د پراخېدو په حال کې ده.

امریکا کې ستیفاني کولیر په نامه یوې روانپوه بي بي سي ته ویلي: "د لنډ وخت لپاره بې خوبي عادي ده خو وروسته د مېړه او ښځې پام کېږي، چې په حقیقت کې کله چې دوی یوازې ویده وي ښه خوب کولی شي."

ستیفان زیاته کړې: "په شریک ژوند کې ښايي یو کس خوب کې خرېږي، یا ښايي پښې او لاسونه ډېر اچوي، یا ډېر تشناب ته ځي او یا هم د خوب ځای کې ډېر اخوا دیخوا رغړي، نو دا کارونه ښايي د شریک ژوند دا بل ملګری نارامه او خوب یې ورخراب کړي."

د ۹۰یمې پېړۍ کهول کې مخ پر زیاتیدونکی دود

د تېر کال وروستیو کې مشهورې امریکايۍ اداکارې کیمرون دیاز د "لېپ سټېک ان دې رم" پادکست کې ویلي و، چې هغه او مېړه یې په یوه خونه کې نه ویده کېږي.

نوموړې زیاته کړې وه: "زه فکر کوم په جلا خونو کې ویده کېدل باید دود کړو."

وروسته له دې څرګندونو پر خواله رسنیو د خلکو سختو نیوکو سره مخ شوه او خلکو بېلابېل مطالب خپاره کړل.

تېر ۲۰۲۳ کال کې د یوې څېړنې پایله چې په امریکا کې ترسره شوې ښيي، له دریو د یوې برخې ډېر خلک کله کله یا تل د ارامه خوب کولو لپاره په جلا خونو کې ویده کېږي.

دا څېړنه همدا راز ښيي، دا چاره د ۹۰ پېړۍ راوروسته کهول کې د (۲۸ تر ۴۲) کلونو تر منځ خلک ترسره کوي.

په دې څېړنه کې نیمايي سلنه کسانو ویلي، چې د ژوند له ملګري/ ملګرې یې د خوب بستر جلا کړی دی.

ستیفاني کولیر ویلي: "داسې حال کې چې دا لا نه ده مالومه چې ولې د خوب د بستر بېلول په ځوانو جوړو کې ډېر لیدل کېږي، خو داسې انګېرل کېږي چې په دوی کې د جلا ویده کېدو فرهنګ بد نه ګڼل کېږي او وايي، چې په جلا بستره کې چې ښه او ارامه خوب کولی شم نو ولې یوازې ویده نه شم؟

د وخت په تېرېدو د یو ځای ویده کېدو فرهنګ بدل شوی

ځینې تاریخ یوهان په دې باور دي چې، " د واده بستره" یا "د ګډو ژوند بستر" چې له واده وروسته مېړه او ښځه یو ځای ویده کېږي د عصري کلتور زېږنده ده او له صنعتي انقلاب سره یې وده وکړه.

دا فرهنګ وروسته له هغې دود شو چې، خلکو په کوچنیو کورونو او ګڼ مېشتو ښارونو کې ژوند کول پیل کړل.

مخکې له هغې، د مېړه او ښځې جلا وېده کېدل دود و.

امریکا کې د خوب برخې یو متخصص ډاکټر پایلو بروکمن په دې اړه ویلي:" او دا دود بیا په هغو کورنیو کې ډېر دود و، چې په ټولنه کې به یې د نورو پرتله ښه او په لوړه کچه ژوند درلود. دا به هم درته ډېره جالبه وي، چې پوه شئ د شاهي کورنۍ غړي به څنګه ویده کېدل."

ګټې یې څه دي؟

متخصصین وايي، هغو جوړو چې د خوب د بسترونو د بېلولو پرېکړه یې کړي وي ډېرې ګټې لري.

ستیفاني کولیر وايي: "اصلي ګټه یې دا ده چې، هغوی ښه او ژور خوب کولی شي او ښه خوب د ښې روغتیا لپاره اړین دی."

نوموړي زیاته کړې: "که څوک خوب و نه شي کولی، رواني او فزیکي حالت یې اغېزمنیږي. د ورځې په جریان کې به ډېر غوسه او بې حوصلې کېږئ او ښايي پر ژور خپګان اخته شئ."

ارواپوهان وايي، دا کار د "سالمې اړیکې" جوړولو برخه کې هم مرسته کوي.

دوی وايي، هغه جوړې چې ارامه او ښه خوب نه کوي یو بل سره ډېر بحث او جنجال کوي او دا د دې لامل کېږي، چې یو بل سره یې مینه او صمیمت کم شي.

امریکا کې د خوب برخې متخصصه سیما کهوسله هم دا خبره مني.

هغه وايي، بې خوبې مو خوی بدلوي او بې حوصلې کوي مو، او دا مو بیا پر شخصي او ټولنیزو اړیکو منفي اغېز کوي.

نوموړې زیاتوي: "د شپې ښه خوب مو د روغتیا او هم د خوشاله ساتلو لپاره اړین دی. نو دا د حیرانتیا خبره نه ده چې ځینې جوړې له یوه بله جلا په بسترونو کې ویده کېږي."

هغه وايي له خپل مېړه سره یې د خوب بستره جلا کړې، چې دې کار یې ژوند ډېر بدل کړی دی.

هغې ویلي: "یوازې ویده کېدل ډېر ښه حس درکوي، په خپله خوښه په هر لټ اوښتی شئ، پښو او لاسونو اچولو ته پراخ او کافي ځای لرئ، چورت وهلی شئ او تر ټولو مهمه دا ده چې اړ نه یاست د خپل ژوند ملګري/ې سره یو ځای له خوبه راویښ شئ، بلکه هر کله مو چې زړه و تاسې له خوبه راویښېدای شئ."

تاوانونه یې څه دي؟

په جلا خونو کې د ویده کېدو پرېکړه پر شریک ژوند ځینې منفي اغیزې هم لرلی شي.

متخصصین وايي، ډېرې جوړې د ځای بېلولو سره په یو ځایوالي کې د مینې د شېبو د له لاسه ورکولو وېره لري.

انام وایي: "له دې کار وروسته احساسوم چې زما او د ژوند د ملګري تر منځ اړیکه کې څه بدلون راغلی."

هغه زیاتوي: "بېل وېده کېدل ستاسې او د ژوند ملګري‌ تر منځ صمیمیت کې بدلون راولي، خو هغومره هم جدي‌ خبره نه ده. زه فکر کوم چې ګټې یې ډېرې دي."

ستیفاني‌کولیر وايي، هغو کسانو ته چې د ورځې ټوله ورځ کار کوي، همدا په بستره کې د ژوند ملګري/ملګرې سره یو ځای پرېوتل یو بل سره د وخت تېرولو او مینې یوازینی فرصت دی.

متخصصین وايي، دا چاره ښايي د ټولو لپاره یو ډول نه وي، ځینې ښايي یو بل سره په ویده کېدو ارامه او راحته وي او کله چې د یو بل تر څنګ په یوه بستره کې ویده شي ښه خوب کولی شي.