تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
سوریه کې پر یوه بازار د روسیې بمبارۍ ۱۱ تنه وژلي
روسي الوتکو د سوریې شمال لوېدیځ ادلب ولایت پر ځینو ښارونو او کلیو د یکشنبې په ورځ بمبارۍ کړې دي. دا ولایت په هېواد کې د وسله والې ټلوالې وروستی مورچل ګڼل کېږي. په تازه بریدونو کې د ټلوالې جنګیالیو او ولسي وګړو ته مرګ ژوبله اوښتې ده.
د سوریې د بشر حقونو د څار ډلې چې بریتانیا کې یې دفتر دی، ویلي په تازه بریدونو کې تر اوسه د ۱۱ تنو د وژل کېدو او نژدې ۳۰ نورو ټپیانېدو خبرونه تایید شوي دي.
دغې ډلې ویلي د ټلوالې تر واک لاندې په جسر الشغور ښار کې پر یوه بازار برید شوی چې د درو حکومت ضد مخالفو وسله والو په ګډون نهه تنه پکې وژل شوي.
ښکاري چې دا بریدونه د بې پیلوټه الوتکو په مټ شوي دي.
جنګي الوتکو چې ډېر ګومان کېږي روس جوړې سوخوی ډوله الوتکې دي، په جسر الشغور کې د سبزیو پر مارکېټ چې د اختر لپاره د پېر و پلور د ګڼې ګوڼې ډک ځای و، بمبار کړی دی.
عیني شاهدانو او ژغورندویانو ویلي، جنګي الوتکو د ادلب ښار لوېدیځ او څنډه جبل الزاویه سیمه کې پر ځینو کلیو بمباري کړې ده. دا هغه ګوښې سیمه ده چې د رویټرز خبري اژانس په وینا په تېرو پنځو کلونو کې روسانو او ترکانو هم پکې خونړۍ جګړې کړې دي.
تر اوسه روسیې او د سوریې پوځ کې ملګرو یې ددغو ادعاوو په اړه غبرګون نه دی ښودلی.
وړاندې مسکو او دمشق ویلي وو چې د دوی د بریدونو هدف وسله والې ډلې دي او پر ولسي وګړو یې بریدونه رد کړي وو.
د سوریې شمال دې ښکار کې چې له ترکیې سره ګډه پوله لري او حکومت مخالفان پرې واکمن دي او ګڼه ګوڼه پکې ډېره وي، تر څلور میلیون ډېر وګړي اوسېږي.