/** * https://gist.github.com/samthor/64b114e4a4f539915a95b91ffd340acc */ (function() { var check = document.createElement('script'); if (!('noModule' in check) && 'onbeforeload' in check) { var = false; document.addEventListener('beforeload', function(e) { if (e.target === check) { = true; } else if (!e.target.hasAttribute('nomodule') || !) { return; } e.preventDefault(); }, true); check.type = 'module'; check.src = '.'; document.head.appendChild(check); check.remove(); } }());

Cais cynllunio ar gyfer gorsaf bŵer nwy ger Abertawe

PwerdyAbergelli Power

Byddai'r orsaf yn cyflenwi'r rhwydwaith trydan cenedlaethol ar adegau brig

Bydd cais newydd yn cael ei gyflwyno i adeiladu gorsaf bŵer nwy yn ardal Felindre ger Abertawe.

Dywedodd Abergelli Power y byddai'r pwerdy i'r gogledd o'r M4 yn cynhyrchu 299 MW o drydan, digon i gyflenwi 150,000 o gartrefi.

Yn ôl y cwmni, byddai'r safle'n gallu cynhyrchu trydan ar fyr rybudd i'r National Grid ar gyfnodau pan fo galw mawr.

Mae'r datblygwyr yn rhagweld y byddai'r cynllun yn creu 15 o swyddi llawn amser, ac y byddai 150 yn cael eu cyflogi yn ystod y cyfnod adeiladu o ddwy flynedd.

Cynllun tebyg yn 2014

Cafodd cynllun tebyg ei gyflwyno yn 2014, gydag ymgynghoriad cyhoeddus yn cael ei gynnal.

Ond yn 2015, gwnaed penderfyniad i beidio bwrw 'mlaen â'r cynllun gwreiddiol oherwydd "amgylchiadau'r farchnad."

Dywedodd y cwmni y bydd cyfnod ymgynghori ar y prosiect diweddaraf yn ystod mis Chwefror.

Pe bai'r cais cynllunio yn llwyddiannus, gobaith y cwmni yw y byddai'r pwerdy yn weithredol erbyn 2022.

Oherwydd mai'r bwriad yw cynhyrchu hyd at 299 MW o drydan bob blwyddyn fe fyddai'r prosiect angen sêl bendith Ysgrifennydd Ynni llywodraeth y DU.