दक्षिण कोरिया रोजगारी: ईपीएस भाषा परीक्षा 'सक्न छ महिना लाग्न सक्छ'

दक्षिण कोरियाको उत्पादनमूलक क्षेत्रमा रोजगारीका लागि भाषा परीक्षाको आवेदन दिने नेपाली युवाहरूको सङ्ख्या बिहीवारसम्म एक लाख ६० हजार नाघेको छ। आवेदकहरूको यो सङ्ख्यामा हेर्दा परीक्षा सक्न छ महिनाभन्दा बढी समय लाग्ने अधिकारीहरूले बताएका छन्।

एचआरडी भनिने दक्षिण कोरियाको मानव संसाधन विकास सेवाले उक्त देशमा रोजगारीका लागि जाने नेपाली युवाहरूको भाषा परीक्षा लिँदै आएको छ।

भाषा परीक्षाको सहजीकरण गर्दै आएको श्रम, रोजगार तथा सामाजिक सुरक्षा मन्त्रालयअन्तर्गत रहेको ईपीएस कोरिया शाखाका अनुसार बिहीवारसम्म एक लाख ६२ हजार जनाभन्दा बढीले निर्माण क्षेत्रमा जाने भाषा परीक्षाका लागि आवेदन दिएका छन्।