'Bishe iyo misore yose' - BBC yatohoje ku bwicanyi bw'isasika muri Goma iri mu minwe ya M23

Ibihe vya nyuma vya Freddy Mukuza vyarabonywe n'umwe mu bagenzi biwe, yari ahagaze hafi nko ku 50m ataco ari bushobore kumufasha.

Aho yumviye ko Freddy yarashwe – n'abagwanyi ba M23 – we n'abandi baciye banyarukira aho vyari bibereye i Goma, mu buko bwa Repuburika ya Demokarasi ya Congo.

''Tuhashitse, twasanze Freddy agihema, duca dushaka kumutwara, ariko M23 ntibatwemereye,'' niko umugenzi wiwe avuga, ngaha tumwita Justin.

''Dushimitse mu kubisaba, baciye barasa hasi nko kuvuga bati: 'Mwihenze mukarenga aha, namwe turabica.'''

Niko rero guca baguma bahagaze kure, mu gihe Freddy, w'imyaka 31 yariko aracikana. Haciye akanya gato, niho M23 yatwemerera kwegera ngo dutware ikiziga ciwe.

Imbere y'uko Freddy yicwa, hari imodoka zitatu zuzuye inyeshamba zari zaje mu kibano ca Freddy – Kasika.

Hari nk'igihe c'isaha icenda z'umuhingamo (15:00) ku wa gatandatu itariki 22 Ruhuhuma (2) – hafi ukwezi kuva uwo mugwi wigaruriye Goma mu bitero vy'umusumiranyo vyamaze akanya gato.

Mu kiringo c'isaha nk'imwe , hagati y'abantu 17 na 22 bari bishwe, cane cane abagabo bakiri bato, nk'uko amasoko yacu abivuga.

Twararonse intahe z'ingene neza na neza vyagenze tuzihawe n'abahaba, tudashobora kuvuga umwidondoro, ku mvo z'umutekano wabo.

Twarasavye M23 kugira ico ishikirije ku bivugwa ko yishe abantu ikivunga aho hantu. Ntibishuye.

Abategetsi i Kasika nta gitigiri basohoye c'abapfuye, kandi nta mahirwe menshi ahari y'uko haba amatohoza yigenga kuri ubwo bwicanyi abanyagihugu bavuga ko ari isasika.

Ariko abahaba bavuga ko M23 ari wo mugwi wonyene witwaje ibigwanisho ukora ata nkomanzi, ukarasa ukica izuba riva i Goma.

Kuva ufashe ico gisagara mu mpera za Nzero (1), abo bagwanyi nibo bagenzura igisagara. Mu minsi 18 twamazeyo, ubutegetsi bwabo bwari ijana kw'ijana.

Muri kahise barigeze kwagirizwa gukora amahano mu tundi turere.

Aba bagwanyi bafise ibigwanisho vyinshi ntibakora bonyene. Bashigikiwe n'igihugu kibanyi c'Urwanda, ku bwa reta ya Congo, ONU na Reta Zunze Ubumwe za Amerika n'ibindi bihugu rutura. Urwanda ivyo rurabihakana, n'ubwo rutagihakana ko rufise ingabo zarwo muri Congo, ruvuga ko ziriyo mu kwivuna.

Vyibazwa ko M23 bagose Kaseka kubera ikambi y'ingabo za Congo yahahoze.

Ikambi ya Katindo ubu irugaye ariko bamwe mu basirikare n'imiryango yabo baracari muri ako karere.

Umunyagihugu umwe wo muri ako karere asigura ati: ''Si abasirikare bose bashoboye guhunga. Bamwe barataye inkoho, baguma mu karere."

Ariko Freddy Mukuza yari umusivire - se w'abana babiri, yagwana n'ubuzima bwa misi yose. Iyo vyagoranye cane, yaca arondera ikimubeshaho mu guca amafaranga yunguruza abantu kw'ipikipiki.

Yari kandi umunyagihugu aharanira uburenganzira akaba n'umwanditsi w'indirimbo yavuga ingorane injojo zihanze igihugu ciwe – igihugu gitunze amabuye y'agaciro menshi ariko abantu baco bakaba bari mu ba mbere bakenye cane kw'isi.

Congo ni igihugu kizwi cane ku bitutire n'ukutagira amaragamo - n'intambara imaze hafi imyaka 30. Aho ni iyo ico gihugu n'umuruho kirimwo hagize uwuvyibuka.

Amabi ashingiye ku gitsina yarahatse indaro. Reta iragoyagoya, iyo vyitwa ko bigendeka.

Hari vyinshi Freddy yoshobora kuvuga mu mudiho wiwe wa rap.

Imwe mu ndirimbo ziwe yitwa Au Secours (Ntabara mu gifaransa), amajambo yayo yuzuye ibibazo bitagira inyishu:

"Ni nde azoza gufasha aba bantu? Ni nde azoza gufasha aba bagore basambanijwe ku nguvu? Ni nde azoza gufasha aba bagabo batagira akazi?... Abantu bari mu kaga, nta vyo kurya bihagije bafise. Bo [abategetsi] bagura ama jeep."

Umunsi Freddy yapfa, yariko arimukira mu nzu nshasha yari agiye gupanga i Kasika. Muramuwe yariko aramufasha gushirako ihema ryo gufuka hejuru y'igisenge.

Na muramukazi wiwe niho yari ari, ariko arategura inzu y'umuryango wa Freddy. Bamaze kwumva amasasu, bari imbere, bihuse kwugara urugi, ariko M23 yari yamaze kubabona.

Inyeshamba za M23 zaciye zirasa baramu ba Freddy babiri zirabica, nk'uko umugenzi wiwe Justin abivuga.

Kuva ico gihe, Justin ntakiva mu nzu, mbere nta n'aho akija kurondera agafaranga. Umuryango wiwe ubeshwaho n'imboga n'ivyamwa. Icayi ubu ni ikintu c'agaciro badashobora kwubahuka.

Yabujije abana biwe kuja kw'ishure, kubera ubwoba bw'uko boshobora gukurwa mu mashure yabo n'aba M23, bakabajana mu gisirikare ku nguvu.

Avuga ati: ''Tubona ari vyiza gusumba ko baguma ngaha kugira ntihagire ico baba''.

Ubu isi yiwe igarukira ku mpome zine z'inzu yiwe. Hama ubwoba ko izi nyeshamba zishobora kugaruka guhiga abakiri bato.

Kubona gusa imwe muri kamyoneti zabo irenganye abantu bariruka, niko avuga.

Muri iyi misi ni gake usanga abakiri bato bari hamwe bariko barayaga, ni ko atubwira, kandi ababanyi ntibakiyaga ibijanye n'ubutegetsi nk'uko vyari bimeze imbere y'uko izi nyeshamba za M23 zifata igisagara.

Agira ati: ''Imbere y'aha, hariho ubutegetsi bubi, ariko twaridegemvya. Hariho ukunyuruza itunga ry'igihugu. Hariho ugutunganya nabi ivy'igihugu, kandi twarabiganirako. Twararonka amahirwe yo kuja muri sentare. Uyu musi, hariho uburongozi bubi, ariko tuba mu bwoba no mu gacerere."

Justin aratuvugisha kuko ashaka ko Freddy Mukuza yibukwa, kandi ashaka ko hanze bamenya ivy'ubuzima n'urupfu bihanze abanyagihugu ku burongozi bwa M23.

Kuva aho ubwo bwicanyi bubereye, Kasika yugarijwe n'ubwoba. Abanyamakuru bo muri ako karere iyo nkuru ntayo bavuze.

Ariko video iteye ubwoba yashizwe ku mbuga hwaniro ku musi ukurikira, igenekerezo rya 23 Ruhuhuma, isa n'iyigaragaza bamwe mu bapfuye: imivyimba 10 iraboneka - yaterewe mu kirundo c'uruzitane, mu kigangara c'inzu itarahera kwubakwa. Ntibizwi nimba mu bapfuye hari abasirikare barimwo.

Nta n'umwe ari mu mwambaro wa gisirikare kandi nta kimenyetso c'ibigwanisho kihari.

Inyuma hari amaborogo n'induru. Umugore umwe aguma asubiramwo ngo : ''Ni 10,'' uko agenda ava ku kiziga aja ku kindi.

Avuga ati: ''Bagiye kutumara twese''. Bishe abo basore bose. Uwo si Junior? Nibaza ko ari we. Ni umwubatsi w'amazu."

Iyo iyo videwo itaboneka, amakuru y'ubwo bwicanyi hari naho atari kurenga ico kibano.

Ariko ayo masanamu yarashegeshe abantu, no muri Congo aho amabi amenyerewe.

Amasoko yacu avuga ko iyo video ari iy'ukuri. Umwe yemeje ko ahantu habonekamwo ari muri Kasika.

Yaragendeye aho hantu ibiziga bimaze kuhavanwa. Kandi yaramenye umwe mu baboneka muri iyo video ariko ararira, aramumenya ko ari uwo muri ico kibano.

Abiri mu masoko yacu avuga ko mutoyi kurusha abandi yapfiriye i Kasika yari umuhungu w'imyaka 13-14. Uwo mwana w'umuyabaga yari mu nzu iwabo, yihishije inyuma ya bashiki biwe.

"Aba M23 bavuze ngo: 'Uyu muhungu ataje ngo tujane, turabica mwese,'"niko umugabo umwe yatubwiye.

Uwo muhungu baca baramujana kumwica.

Mu bishwe harimwo n'umugore akiri muto. Yari asanzwe agurisha amata mu mabarabara y'uruja n'uruza rwinshi.

Harishwe kandi uwundi mucuruzi wo mw'ibarabara wo mu myaka mirongo ibiri.

Igihe amasasu yatangura kwasana, yari ari aho asanzwe akunda kwicara – ku rubaraza imbere y'umuryango w'inzu yiwe, agurisha ama inite (unites) ya terefone ngendanwa hamwe n'ibitumbura yikorera.

Yumvikanye ariko aratakambira abo bitwaje ibigwanisho ati: ''Sindi umusirikare.

"Ngurisha ama inite nta kindi. Raba, ivyo ni ibintu vyanje - ama inite yanje n'ikapo y'ibitumbura."

Yaciye yiruka. Umwe mu bagenzi biwe aca arabandanya iyo nkuru. Turamwita John.

"Nari muri iyo nzu, numva amasasu'', niko John avuga. "Abantu bariko bavuga ngo 'Bafata abakiri bato ku gahato.' Nabonye abantu bariko bariruka, harimwo n'umugenzi wanje, nca nirukana na bo.

"Dushitse kw'ibarabara rikuru, bararashe, numva amasasu inyuma yanje, hanyuma umuntu aragwa."

Uwo yari umwe agurisha ibitumbura.

Naho yari afise imyaka itari mike, yari akiri mw'ishure rikuru, mu mwaka wiwe wa nyuma. Yari umunyeshure w'umunyamwete kandi yatanguye amashure atevye kubera ko umuryango wiwe utagira amahera yo kumurihira amashure.

Ariko John avuga ati: ''Nk'abandi bakiri bato bose, yari afise indoto''. Ku bimwerekeye, yifuza kuba umu enjeniyeri.

John avuga ko abo bitwaje ibigwanisho mu kwica bajaniranya.

Ati: "Nta no kubanza gutohoza imbere y'uko barasa". Barashe abantu bose bari ngaho n'abirutse, mu nzira zibiri zitandukanye."

Igihe aba M23 bafata Goma, bamenyesheje ko ata mabohero bafise. John avuga ko ata yindi nsiguro yari ikenewe: "Ivyo vyasobanura ko uwo wese aketswe ko ari umusirikare wa reta, canke umusuma, canke uwo wese akoze ikosa, azokwicwa - ubwo nyene."

Inyuma y'amayinga atari make, ni bake bubahutse kubivuga. John ati: ''Nta n'umwe yipfuza kuba uwukurikira.''

Imiryango yabuze yafuvye abayo gihutihuti - ata kugandara muhira nk'uko bisanzwe.

"Izi nyeshamba ntizashaka ko abantu bahamba ababo", bivugwa n'umwe mu bahaba, hano tumwita Deborah.

Ati: "Ntibashaka mbere ko n'abantu barira. Twari tuzi ko baje kuzana amahoro, none ahubwo baje kudutikiza. Batwara uwo wese basanze mu nzira."

Igihe abo bagabo bariko barafatwa, yaragerageje kuja ahabona. Izo nyeshamba zamutegetse gusubira mu nzu, zimurabishijeko inkoho.

Denis Baeni yariko arataha, igihe abo bitwaje ibigwanisho bashika i Kasika. Yaciye yiruka yinjira mu kaduka gatoyi kugira ngo yihishe n'abandi bakeyi, nk'uko amasoko yacu yatubwiye.

Uwo mwigisha w'ishure ry'intango yaciye asokorora ikarata yiwe karangamuntu mu mufuko. Yibaza ko ishobora kumukiza mu kwerekana ko ari umu sivire.

Umubanyi - azi ivyabaye, - aratubwira ivyaciye bishika. Turamwita Rebeka.

Rebecca avuga ati: "Barumvise ijwi rivuye hanze ribaza riti: 'Hari abasoda bari ngaho">Soma ibijanye n'aho duhagaze ku mihora ijana ahandi