/** * https://gist.github.com/samthor/64b114e4a4f539915a95b91ffd340acc */ (function() { var check = document.createElement('script'); if (!('noModule' in check) && 'onbeforeload' in check) { var = false; document.addEventListener('beforeload', function(e) { if (e.target === check) { = true; } else if (!e.target.hasAttribute('nomodule') || !) { return; } e.preventDefault(); }, true); check.type = 'module'; check.src = '.'; document.head.appendChild(check); check.remove(); } }());

Prifysgol Bangor yn adolygu toriadau i'r archifdy

Cwad BangorGeraint Tudur

Mae Prifysgol Bangor wedi cadarnhau eu bod yn adolygu cynlluniau posib i wneud toriadau i'r adran archifau.

Roedd nifer wedi mynegi pryderon am ddyfodol adran Archifau a Chasgliadau Arbennig Prifysgol Bangor yn sgil cynlluniau posib i ostwng nifer y staff yno o bedwar i un.

Daw'r cyhoeddiad eu bod yn adolygu'r toriadau yn dilyn pwysau sylweddol gan wleidyddion a'r cyhoedd.

Mae dros 2,700 o bobl wedi llofnodi deiseb yn galw ar y brifysgol i achub yr archifdy rhag y toriadau.

Roedd yr adran yn rhan o ymgynghoriad ehangach i geisio arbed tua £5.3m, sy'n golygu colli tua 78 o swyddi llawn amser.

Dywedodd Siân Gwenllian, Aelod Plaid Cymru dros Arfon yn y Senedd: "Mae staff a myfyrwyr wedi dod ata i gyda phryderon am wahanol agweddau'r cynigion, a 'nes i gyfleu hynny'n uniongyrchol i'r is-ganghellor ac uwch gynrychiolwyr.

"Dwi'n falch eu bod nhw wedi gwrando ar gryfder y teimlad, a rŵan yn ailystyried y toriadau arfaethedig i'r archif.

"Fe fyddan ni rŵan yn parhau i gyflwyno'r achos dros atal diswyddiadau gorfodol."

Pynciau cysylltiedig