/** * https://gist.github.com/samthor/64b114e4a4f539915a95b91ffd340acc */ (function() { var check = document.createElement('script'); if (!('noModule' in check) && 'onbeforeload' in check) { var = false; document.addEventListener('beforeload', function(e) { if (e.target === check) { = true; } else if (!e.target.hasAttribute('nomodule') || !) { return; } e.preventDefault(); }, true); check.type = 'module'; check.src = '.'; document.head.appendChild(check); check.remove(); } }());

Trên wedi gadael heb deithwyr a'u gadael mewn 'dryswch'

Trevor GreenfieldRobin Jenkins

Roedd Trevor Greenfield a'i wraig ymhlith y grŵp o wyth o deithwyr a gafodd eu gadael yn Swindon

Mae cwpl o Gymru wedi cwyno ar ôl i yrrwr trên gorlawn eu hannog i fynd i ffwrdd i gael awyr iach, cyn gadael hebddyn nhw.

Roedd Trevor Greenfield, 74, a'i wraig, Eileen, 68, ymhlith y grŵp o wyth o deithwyr a gafodd eu gadael yn Swindon, ar ôl mynd ar y trên o Lundain i Gaerfyrddin.

"Roedd pobl mewn trallod ac yn ddryslyd," meddai Mr Greenfield, sydd o'r Barri.

Ychwanegodd ei fod yn "bryderus ac yn siomedig" nad oedd y gyrrwr wedi dweud eu bod yn gadael.

Ymddiheurodd cwmni Great Western Railway (GWR) am yr anghyfleustra a achoswyd.

'Mewn sioc'

Aeth Mr a Mrs Greenfield ar y trên o Lundain i dde Cymru ar 10 Ebrill, ond roedd yn orlawn o deithwyr oherwydd bod dau drên cynharach wedi'u canslo.

Bu'n rhaid iddyn nhw sefyll gyda 10 person arall mewn amodau poeth a chyfyng am oddeutu awr, nes i'r trên stopio yn Swindon, ble roedd oedi o tua chwarter awr.

Dywedodd Mr Greenfield fod y gyrrwr wedi cyhoeddi y byddai swyddog yn agor y drysau fel y gallan nhw fynd oddi arno a chael awyr iach wrth aros.

Gorsaf Paddington yn LlundainGetty Images

Aeth Mr a Mrs Greenfield ar y trên o Paddington yn Llundain i dde Cymru ar 10 Ebrill

Dywedodd Mr Greenfield fod grŵp o wyth o bobl wedi dod i ffwrdd a sefyll tua metr o'r trên, a'u bod yn aros i gael gwybod pryd i fynd yn ôl ymlaen.

Ond yna, heb unrhyw gyhoeddiad, fe gaeodd drysau'r trên ac fe ddechreuodd symud.

"Fel grŵp, roedden ni mewn sioc," meddai Mr Greenfield.

"Dechreuodd pobl weiddi a chwifio mewn panig ar y swyddog - oedd gryn bellter i ffwrdd."

Roedd eu bagiau hefyd ar fwrdd y trên a adawodd hebddynt.

Fe lwyddon nhw i gael trên o Swindon i Gaerdydd yn y pendraw, ac fe lwyddon nhw i gael eu bagiau yn ôl.

Mae Mr Greenfield wedi gwneud cwyn swyddogol i GWR, gan ei ddisgrifio fel "diwrnod hir a phryderus".

'Dim cyhoeddiad o gwbl'

Dywedodd teithiwr arall a gafodd ei adael yn Swindon, Liam Svensen, 23, fod y digwyddiad yn "siomedig ac annerbyniol".

"Doedd dim cyhoeddiad o gwbl i ddweud wrthyn ni am fynd yn ôl ar y trên," meddai.

Dywedodd llefarydd ar ran GWR eu bod yn "ymddiheuro i gwsmeriaid a gafodd eu heffeithio".

Ychwanegodd bod criwiau ar fwrdd y trên wedi gwneud y gwiriadau angenrheidiol cyn iddo ailddechrau.

"Rydyn ni'n deall fod rhai cwsmeriaid ddim wedi dod yn ôl ar y trên yn ystod y cyfnod yma, ac mae'n wir ddrwg gennym am yr anghyfleustra a achoswyd."

Pynciau cysylltiedig