Waraana daldalaa Tiraampi baneef Kanaadaa, Meksiikoo fi Chaayinaan deebii jabaa tahe kennaa jiru

Haguuggii Tamsaasa Kallattii

1. 2 Guraandhala 2025Pirezidaantiin Meksiikoo deebii jabaa Tiraampiif deebiste

   Pirezidaanti Doonaaldi Tiraampi oomishaalee fi meeshaalee Meksiikoo, Kanaadaa fi Chaayinaa irraa galan irratti qaraxa daballaan gaggeesitoonni biyyoota kanneenii deebii murtee kana madaalu fudhachaa jiru.

   Pirezidaantiin Meksiikoo, Kilaadiyoo Sheenbuum ''yakkamtootatti meeshaalee waraanaa gurguddaa oomishee kan gurguru warshaalee Ameerikaati.

   Kanaaf Ameerikaan meeshaa waraanaa seeraan ala gara daangaa keenyaatti galu nurraa dhaabuu qabdi jette pirezidaantittiin.

   Tiraampi ammoo godaantota Meksiikoodhaa galan yakkamtoota jechuun yeroo hedduu waama.

   Pirezidaantittiin Tiraampi waliin atakaaroo keessa galuu hin barbaadu jette. Waliin taanee dhimma fayyaa hawwaasaa fi nageenyaa irratti waliin hojjenna jette.

   Qorichoonni sammuu hadoochan karaa Meksiikoo Ameerikaa galu kan jedhuuf deebii kanas kennite.

   Dabalataan ministeerri faayinaansii biyyattii tarkaanfii qaraxaa fi qaraxaan alaa faayidaa biyyaalessaa Meksiikoo kabachiisu akka fudhatus ajajje.

2. 2 Guraandhala 2025Kanaadaa fi Meeksikoon qaraxa Tiraaamp irra kaa'e haaloo bahuuf dhaadatan

   

   Madda suuraa, Getty Images

   Pirezedantiin Ameerikaa Doonaald Tiraamp qaraxa haaraa meeshaalee biyyoota Chaayinaa, Meeksikoo fi Kanaadaarraa Ameerikaa seenanirra kaa’an.

   Tiraamp qaraxa %25 Kanaadaa fi Meeeksikoorra, Chaayinaarra %10 kaa'an kun Kibxatarraa eegalee hojiirra oola.

   Damee anniisaa Kanaadaarra taarifa isa xiqqaa %10’n kaa'e Tiraamp.

   Tiraamp yoo biyyoonni sadan daddabarsa qoricha sammuu namaa adoochuu fi godaantotaarratti yaaddoo uuman jedhuuf xiyyeeffannoo akka hin kennine ibse.

   Qaraxa biyyoota sadanirra kaa’uuf kanaan dura doorsisee ture Tiraamp.

   Kanaadaa fi Meeksikoon qaraxa Tiraamp isaanirra buuse ittiin haaloo bahan qopheessaa jiru.

   Biyyoonni lamaan yoo haaloo bahan dubbicha hammeessuuf akka jiru akeekera.

   Chaayinaa, Meekisikoo fi Kanaadaan walumatti oomisha Ameerikaa seene keessaa %40 qabu.

   Tiraamp toora X gubbatti akkas jechuun maxxansan;''Qaraxi har’a ifoomsinu kun Chaayinaa, Meeksikoo fi Kanaadaan dawaa summaa’aa gara Ameerikaatti yaa’uf dhaabuuf waadaa seenaniif ittigaafatamoo gochuuf'' jedhan.

3. 2 Guraandhala 2025'Haleellaa lafa gabaa Sudaanitti raawwatameen namoonni 54 ajjeeffaman'

   Kaleessa ganama dhootuun Humna Addaa Sudaan-RSF lafa gabaa Omdurraamanitti darbate hordofee reeffii namootaa haleellaa sanaan du’anii hospitaala MSF deeggaru qaqqabee ture.

   Ministeerri Fayyaa Sudaan akka jedhutti, namoonni 54 haleellaa sanaan ajjeeffamuun, namoonni 158 ammooo madaa’aniru.

   Ogeeyyiin fayyaa hospitaala Al-Naho jedhamu hojjatan dargaggoo hanga maanguddoootti namoonni wal’aansaaf hospitaalicha seenaa turan jedhan.

   Barreessaan Olaanaan MSF Kiriis Lookeryiir wayita namoonni wal’aansaaf hospitalicha geeffamu eegalan hospitaalicha keessa turan.

   ‘’ Lubbuu daa’immanii, dhiiroota fi dubartootaa bade argaan jira, namoonni mada’aan kutaa wal,aansa atattamaa guutaniiru. Namoonni garmalee miidhaman jiru, kutaan reeffaa reeffan namootaan dhiphateera,’’ jedhan.

   ‘’Waantin arge kun fakkeenya hammeenya waraana ummatarratti gaggeeffamu akeeka,’’ jedhan.

4. 2 Guraandhala 2025Haleellaa Raashiyaa, mana barumsaa Kuriskitti raawwatameen namoonni afur ajjeefaman

   

   Madda suuraa, Getty Images

   Raashiyaan mana barnootaa naannoo Kursikitti argamutti, namoota nagaa mana barnoota keessaa da’eeffataniirratti haleellaa raawwatte jechuun Pirezedantiin Yuukireen Voloodmiir Zeleniskiin himatan.

   Waraanni Yuukireen akka himetti, namoonni afur haleellaa sanaan ajjeeffaman.

   Namoonni naannoo Kursik magaalaa Sudiza jedhamutti miidhaman keessaa irraan caalan isaanii maanguddoota. Naannoon Raashiyaa kun ji’oota shanitti dhiyaatuuf to’annoo waraana Yuukireen jala jirti.

   Gamoo mana barnoota sana keessaa namoonni 80 ol baraaramuun eerameera.

   BBC'n himannaa Yuukireen haleellaa Raashiyaan itti yaaddee raawwatte jettu hin mirkaneessine. Mooskoon garuu halleellaa raawwatame kanaaf Yuukireen himatte.

5. 1 Guraandhala 2025Tamsaasni kallattii xumurame

   Tamsaasni kallattii BBC Afaan Oromoo guyyaa Sambataa xumurame.

   Odeeffannoo dabalataaf Chaanaalii WhatsApp akkasumas fuula Facebook keenya mil'adhaa.

   Lafa nagaa bulaa!

6. 1 Guraandhala 2025Waa'ee ajjeechaa Simboo Shawaa Lixaatti raawwate maal beekna?

   

   Madda suuraa, Family

   Daa'imni umurii 10 taatu, Simboo Birhaanuu, torban kana qe'ee warra ishee keessatti ajjeefamtee argamuun mufiifi dheekkamsa kaaseera.

   Gabaasa guutuu: 'Simboon gudeedamtee fannifamte' - Maatii

7. 1 Guraandhala 2025Filisxeemonni madaa’an ji'ootaan booda yeroo duraaf Raafaan baafaman

   

   Madda suuraa, Reuters

   Gareen Filisxeemoota madaa’an kan jalqabaa wal'aansa fayyaa isaan barbaachisuu erga karaa daangaa kibbaatiin qaxxaamurri daangaa Raafaa irra deebiin banamee booda Gaazaa irraa gara Masriitti geeffaman.

   Kunis karaa tokkicha Masrii fi Gaazaa gidduu jirudha.

   Ministeerri fayyaa Hamaasiin geggeeffamu akka jedhutti, dhukkubsattoonni 50 wal'aansa fayyaa argachuudhaaf karaa qaxxaamura kanaatiin Gaazaa irraa gara Masriitti ce'aniiru.

   Qaxxaamurri kan Gaazaan "karra addunyaa" jettee waamtuun kunis erga Caamsaa bara 2024 irraa eegalee namoota nagaatiif cufameera.

8. 1 Guraandhala 2025Dubartii Hamaas buufatalee UN keessatti akkashee hidhe dubbatte

   

   Madda suuraa, Reuters

   Dubartiin lammummaa Biriteen fi Israa'el qabdu ji’oota 15f Gaazaa keessatti Hamaasiin ugguramte, yeroo muraasaaf buufatalee Dhaabbata Mootummoota Gamtoomaniitti hidhamtee akka turte dubbatti.

   Ministira Muummee UK Sar Kiir Istaarmar waliin bilbilaan kan dubbatte, Emilii Damarii, kan jalqaba baatii kanaa gadhiifamte, buufata Ejensii Baqattoota Filisxeem (UNRWA) ta'an keessatti akka hidhamte himte.

   Yeroo butamte harkaa fi miila irratti rasaasaan rukutamtus wal'aansa fayyaa akka dhorkamte dubbatteetti.

   UNRWA ibsa baaseen, himannaan namoonni butaman buufatalee isaanii keessatti qabameera jedhu ''baayyee hamaa'' jechuun, himannaa kana irratti qorannoon walaba ta'e akka gaggeeffamu gaafateera.

   Israa’el irra deddeebiin UNRWA haleellaa Onkoloolessa 7 irratti hirmaachuu ishee himattee, gamoo isaanii Gaazaa keessa jiru Hamaas akka itti fayyadamu dubbatteetti.

   Mootummaan Israa’el dhaabbatichi akka hin hojjenne dhorkuuf karoorfateera.

9. 1 Guraandhala 2025Hidhamtoonni Filisxeem 183 gadhiifamuu Israa'el beeksiste

   

   Madda suuraa, Reuters

   Gaazaa keessatti namoonni butaman sadii erga gadhiifamaniin booda, hidhamtoonni Filisxeem 183 har’a gadhiifamuuf ture.

   Haata’u malee akka dhaabbanni oduu Hamaas waliin hidhata qabu Safaan ibseetti, hidhamtoonni Filisxeem 25 ta’an, Lixa Ramalaah, magaalaa Beyituniyaaa, gahaniiru.

   Akkasumas Filisxeemonni madaa’an wal'aansa fayyaa argachuuf yeroo jalqabaaf gara Masrii baafamaniiru.

   Ministeerri Fayyaa Hamaasin gaggeeffamu dhukkubsattoonni 50 kunuunsa yaalaa argachuuf karaa qaxxaamura Gaazaarra gara Masrii deemuu ibse.

   

   Madda suuraa, Reuters

   

   Madda suuraa, Reuters

10. 1 Guraandhala 2025Hidhamtoonni Filisxeem bilisa ta'an West Baankii gahaniiru

    Hidhamtoonni Filisxeem amma West Baankiitti otobusii irraa bu'aa jiru.

    Namoonni baay'een konkolaataa sana marsaniiru.

    Hidhamtoonni Filisxeem gadhiifamuu dursee konkolaattonni hedduun mana hidhaa Israa’el Ofer bakka hidhamtoonni Filisxeem 183 har’a gadhiifamuuf jiran keessaa bahaaniiru.

11. 1 Guraandhala 2025'Namni na caalaa gammachuu qabu hin jiru' - Haadha warraa nama gadhiifamee

    

    Madda suuraa, Reuters

    Haati warraa Kiit Siigel isa waliin wal arguuf deemaa jirti.

    Adriineen Siigelis mana isaanii irraa Hamaasiin kan fudhatamte yoo ta'u, Sadaasa bara 2023 ture kan gadhiifamte.

    Viidiyoo isheen "Guyyaan Guddaan gaheera, Ani gammadeera, namni na caalaa gammachuu qabu hin jiru," jette konkolaataa tokko seentee garasaa deemte.

    Akkuma gabaasneen, Kiit Siegel har'a magaalaa Gaazaa keessatti gadhiifamee amma gara Israa'el geefamaa jira.

12. 1 Guraandhala 2025Namni saddaffaa Hamaasin uggurame gadhiifame

    

    Kiit Siigel kan lamummaa Ameerikaa fi Israa'el qabu Hamaasiin gadhiifameera.

    Namoonni Tel Aviv keessatti gadhiifamuusaanii hordofaa turan gammachuu qaban ibsaniiru.

    “Inni goota, gootadha,” jechuun namoota walitti qabaman dhaadatan.

13. 1 Guraandhala 2025Hamaas namoota uggure lama Israa'elitti dabarsee kenne

    Erga Israa’eliifi Hamaas waliigaltee dhukaasa dhaaburra gahan booda Hamaas namoota ugguree fudhate deebisaa jira, Israa’elis namoota hiite hiikaa jirti.

    Guyyaa har’aa Hamaas namoota uggure lama Yaarden Biibas, ganna 34, akkasumas Ofer Kaalderon, ganna 53, gadhiisee gara daangaa Israa’elitti ce’aniiru.

    Lamaanuu dhiiradha. Waraanni Israa’el akka mirkaneessetti, kanneen deebifaman gara Kibba Israa’el itti simatamanitti geeffamaa jiru.

    Nami sadaffaan Hamaas gadhiisu eegamaa jiru. Nami kuni lammii US-Israa’elidha.

    Erga waliigalteen dhukaasa dhaabuu gahamee booda yeroo afraffaafi kanneen ugguraman kan gadhiifamaa jiran.

14. 1 Guraandhala 2025Attam bultan!

    Tamsaasi kallattii BBC Afaan Oromoo guyyaa Sambataa eegaleera.

    Oduuwwan biyya keessaafi alaa isin biraan geenya.

    Miseensa Chaanaalii WhatsApp akkasumas Facebook BBC Afaan Oromoo ta'aa.

    Lafa nagaa oolaa!

15. 31 Amajjii 2025Gaanaatti miseensonni paarlaamaa keessatti wal-lolanii meeshaalee hedduu caccabsan

    

    Madda suuraa, Daily Grap

    Paarlaamaa Gaanaa keessatti miseensonni parlaamaa wal-lolanii meeshaalee garaa garaa parlaamaa keessa jiru caccabsan.

    Miseensonni paarlaamaa biyyattii Kamisa halkan yaa'ii taa'anii osoo jiranuu afaan keessa wal-bahuu eegalan.

    Ittaansun wal-abootuufi wal-daddarbachuu eegalan. Teessoofi meeshaalee akka maayikroofoonii fa'aas caccabsaniiru.

    Boodarra poolisiin waamamee gidduu galuun haalicha tasgabbeesse.

    Waldhabdee paraalaamaa biyyattii keessatti mudateef sababni ammoo koreen to'annoofi hordoffii ajandaawwan marii ka'an heddu mormuu isaatiini.

    Har'a ganama itti gaafatamaan koree to'annoofi hordoffii uummata biyyattii dhiifama gaafataniiru.

    "Wanti mudate tasumaa fudhatama kan hin qabneedha" jechuun waanti qaanessaan mudachuu ibsuun uummata dhiifama gaafatan.

    Miseensonni paarlaamaa wal reeban

    Miseensonni Paarlaamaa Gaanaa abootteen wal haleelan

    Miseensonni paarlaamaa Ugaandaa waltuman

16. 31 Amajjii 2025Kaampaalaatti weerara Iboolaa haaraan narsii ajjeese

    

    Madda suuraa, Getty Images

    Ministeerri fayyaa Yugaandaa magaalaa guddoo biyyattii Kaampaalaatti weerarri vaayirasii Iboolaa haaraan ka'u mirkanneesse. Hanga ammaattis namni tokko ittiin du’uun isaa gabaafame.

    Namni dhibee kanaan du'es, narsii dhiiraa kan ganna 32 yoo ta'u, mallattoon dhukkuba kanaa "gubaa qaamaa cimaa, dhukkubbii garaa fi hafuura baafachuu irratti rakkachuufi bakka hedduudhaan qaama keessaa dhiingi dhagala'uu" kan dabalatudha.

    Namni kunis guyyaa Roobii darbe Hospitaala Biyyoolessaa Mulaangoo kan kutaa daldalaa bulchiinsa giddu galeessaa keessatti argamutti qaama hedduu hojii dhaabuudhaan du'e.

    Kunis erga bara 2000tti dhukkubni Iboolaa jalqabuunsaa galmaa'ee as Yugaandaa keessatti yeroo 8ffaaf mudachuusaati.

    Dhukkubni Vaayirasii Iboolaa Sudaan (SUDV) dhukkuba baay’ee daddarbaa ta’ee fi kan dhangala’aa qaamaa fi tishuuwwan nama dhukkuba kanaan qabaman waliin wal qunnamuudhaan daddarbudha.

    Innis gosoota vaayirasii Iboolaa weerara vaayirasii fiduudhaan beekaman hedduu keessaa isa tokkodha.

    Narsiin amma dhibee kanaan du'e kunis guyyoota du'a isaatiin duratti, osoo dhibeensaa adda hin baafamiin dura gara dhaabbilee fayyaa hedduu akkasumas ogeessa fayyaa aadaa deemee ture.

    Akkasumas gara hospitaala mootummaa magaalaa Mbalee kan daangaa Keeniyaan waliin wal daangeffamuutti argamutti deemeera.

    Hojjettoota eegumsa fayyaa 30 dabalatee, namoonni narsii du’e kana waliin tuttuqqiin namoota 44 hordoffiidhaaf adda baafamuu ministeerichi beeksiseera.

17. 31 Amajjii 2025Saanduqa gurraacha jeettii imaltoota US irratti qorannoon eegalameera

    Saanduqiiwwan gurraachi jettii imaltootaa Ameerikaa hilikoptarii waraanaa waliin walitti bu'uudhaan Laga Pooomaak keessatti dhidhimee Kamisa kaleessaa halkan cacabaa xiyyaarichaa keessaa argameera.

    Suuraa saanduqichaa kan balaa halkan Roobii mudachuudhaan lubbuu namoota 67 galaafatee irratti maal akka mudate eeruu kennu danda'u mudaasni kunooti.

    

    Madda suuraa, NTSB

    

    Madda suuraa, NTSB

    

    Madda suuraa, NTSB

18. 31 Amajjii 2025Finciltoonni DR Koongoo hanga magaala guddoo to'ataniitti akka loluu itti fufan ibsan

    

    Madda suuraa, Getty Images

    Baha RD Koongootti magaalaa ijoo kan taate Goomaa kan to'atan finciltoonni Koongoo, magaalaa guddoo biyyattii Kinshaasaa hanga to'ataniitti waraanaa akka itti fufan beeksiisan.

    M23 dabalatee gamtaa finciltootaa kan dursan Koorneey Naangaa akka jedhaniitti, galmiisaanii dhumaa mootummaa pirezidanti Feeliiksi Tiishiisekiidiin kuffiisuudha.

    Sadarkaa idil-addunyaatti waamichi dhukaasa dhaabuu taasifamulleen, finciltoonni Ruwaandaadhaan deeggaraman garuu bahatti magaalaa guddoo lammaffaa fi kan albuudaan badhaate Bukaavuu to'achuudhaaf imalaa jiru.

    Goomaan ergaa harka finciltootaa galteen booda, haasaa pirezidantiin biyyattii karaa TVn dabarsaniitiin, ''deebii cimaafi qindaa'aa kennuudhaan'' deebiisanii naannicha harka finciltootaatii baasuuf hojjataa jirra jedhan.

    ''Waan tokko mirkana ta'u qabdu, DR Koongoon akka salphattu hin hayyamnu. Ni lolla ni injifannaas'' jechuun Roobii galgala dubbataniiru.

    Waraanni kunis namoonni kuma 500 ta'u qe'eesaarraa akka buqqa'u taasisuudhaan, rakkoonni namoomaa duraanu ture akka cimu taasiisuu Dhaabbanni Biyyoota Gamtooamanii ibseera.

    Naangaan buchiitoota haaraa Goomaa ta'usaanii gaazexessitootatti himuudhaan, itti gaafatamummaa fudhachuun akka hojjatan Kamisa kaleessaa beeksiisaniiru.

    Erga torban darbe keessa waraanni cimaa dhufee as magaalatii keessatti dhiyeessitiin ibsaa fi bishaanii adda cituun, hir'inni nyaataa mudachuun gabaafameera.

    ''Imala bilisummaa hanga Kinshaasaa jiru itti fufna'' jechuun dubbatan dursaan fincitootaa kun.

19. 31 Amajjii 2025Osoo hir'inni hojjattootaa qoratamaa jiruu saanduqi gurraachi balaa xiyyaara DC argame

    

    Madda suuraa, NTSB

    Saanduqni gurraachi xiyyaarri imaltootaa Waashingitan DCtti hilikoptara waraanaa waliin walitti bu'ee kan argame yoo ta'u, baayyina hojjattootaa fi murteessan naannoo buufata xiyyaarichaatti darban irratti gaaffiileen ka'aa jiru.

    Akka hojimaataa barameetti hilikptarootaa xiyyaaroota naannichara balal'inaiif namoota lamatu to'annoo tiraafika qilleensaa gaggeessaa kan ture yoo ta'u, tibba balaan kun mudateetti garuu nama tokko qofaa akka ture michuun BBC Ameeriaa CBS maddeen waabeefachuun gabaaseera.

    Balaa lubbuu namoota 67 kan jeettii imaltootaa fi hilikoptara keessa ture balleessee kana ilaalchisuun aanga'oonni qorannoo gaggeessuu eegalaniiru.

    Boordiin Nageenya Geejiba Biyyaaleessaa NTSB)n gabaasa sadarkaa jalaqabaa guyyoota 30 keessatti ifa akka taasisuu beeksiiseera.

    Saanduqi gurraachi sagalee balaliiftootaa fi odeeffannoo balaliinsaa ittiin waraabamu balaliinsa irratti rakkoon akkam akka ture irratti eeruu ni kennu.

    Saanduqoonni argaman kunneenis gara laaboraatorii NTSB geeffamuu fi qorannoon gaggeffamaa jiraachu CBS ibseera.

    Dhimmi hir'ina hojjataa to'attoota tiraafikii qilleensaa Niiw Yoork Taayimsiin yeroo jalqabaatiif gabaafame ''kan hin baramne miti'' jechuudhaan gabaasa sadarkaa jalqabaa Bulchiinca Aviyeeshinii Federaalaa (FAA)tiin ibsameera.

    Mootummaan federaalaa eddoowwan ijoo muraasa FAA keessatti argaman guutuudhaaf waggootaaf yaa;aa tureera.

    To'ataan tiraafika qilleensaa tokko buufata xiyyaara biyyaaleessa Reegan Waashingitaniitti, haalli hojimaata hilikooptarootaafi xiyyaarota ittiin to'atu kan barameefi kan qajeelfamas hin cabsiineedha jedhameera.

    Lubbuu baraartoonni galaana Pootomaak kan garmalee cabbaa'u keessaa miidhamtoota baraaruuf yaalaa kan turan yoo ta'u, hojiin barbaachaa Kamisa galgala sababii balaa cimaatiin akka adda citu taasifameera.

    Xiyyaarri imaltootaa namoota 64 qabatee ture hilikoptarii namoota sadi keessa turan waliin walitti bu'uun kan galaana keessatti kufan yoo ta'u, hanga ammaatti reffa namoota 28 (27 xiyyaricha keessaa fi tokko hilikoptaricha keessa kan ture keessaa) argamuutu gabaafame.

20. 31 Amajjii 2025Intalli pirezidantii duraanii Afriikaa Kibbaa, Zuumaa shorokeessummaan himatamte

    

    Madda suuraa, Getty Images

    Intalli pirezidantii duraanii Afriikaa Kibbaa Jaakoob Zuumaa, Duuduuzil Zumaa-Saambudlaa, jeequmsa bara 2021 biyyattii keessatti mudachuudhaan namonni 300 ol ittiin ajjeefaman keessatti hirmaateetti jedhamun himannaan shororkeessummaatiin mana murtiitti dhiyaatte.

    Waggaa afuriin dura muddama Zuumaan hidhamuun wal qabatee umameen, jeequmsi, okkooraa fi sodaan magaalaa buufata doonii taatee Darbaan keessaa umamuun, achiis gara Gaa'wtengitti babal’ate.

    Intalli pirezidantichaa Zuuma-Saambudlaa, kan ofiisheetiin nama falmisiistuu taate, barreefffama maxxansaalee jeequmsa siiviilii kanaaf ka'umsa ta'e miidiyaa hawaasaa qooduun himatamte.

    Hidhaan kunis ''bu'aa qorannoo of eeggannoo qabuun gaggeeffameen'' booda kan raawwatame ta'u dubbi himaan kutaa poolisii Hawks elite, kan Brig Thandi Mbambo beeksiiseera.

    Zuumaa- Saambudlaan Kamisa ganama buufata poolisii Giddugaleessa Darbaanitti of kennitee seera eegumsa dimokiraasii heera mootummaa shororkeessummaafi sochiiwwan kanaaniin walqabatan irratti himannaafi jeequmsa raawwachuuf kakaasuu jalatti himatamuu poolisiin beeksiseera.

    Dubbi himaan Abbaa Taayitaa Abbaa Alangaa Biyyaalessaa Mthunzi Mhaagaa dhimmichi ''walxaxaa'' fi ''addaa'' waan ta'eef qorannoon kun yeroo dheeraa akkasii fudhateera jedhan.